Lyon, Naiwieng:
Ki pulit jong ka France ha ka Sngi U Blei ki la pynbna ba ki la bat noh shuwa ia 6 ngut kiba suba don kti halor ka jingpyniap ia uwei u khynnah nong France 16 snem ka rta, uba la khlad hapdeng ka jingleh kmen- leh sngewbha hapoh ka shnong jong u, ha kaba katei ka jingjia ka la wanrah ia ka jingiakynad ha katei ka thaiñ ha ka taiew ba la lah.
Ha kane ka taiew ba la leit, la ong ba utei u khynnah 16 snem, uba la ithuh kum u Thomas, u la shah dung pynmynsaw ha kawei ka kynhun jong kiba nabar shnong bad kiba la leit ban rung sha ka jaka ba ialum paidbah ha Crepol, kaba don sha ka phang Southeast jong ka thaiñ Drome.
Kumta, la ong ba utei u khynnah u la khlad noh tang shiteng lynti shuwa ban poi sha jaka sumar bad 8 ngut kiwei pat ki la mynsaw bad ngat lang ha katei ka jingjia, ha kaba 3 ngut napdeng jongki, ki dei kiba la mynsaw jur bha.
Kumta, ki pulit jong ka France ha ka Sngi Ba-ar jong katei hi ka taiew ba la lah, ki la ioh bat noh ia 9 ngut ki suba don kti ha kane ka jingjia, katba 3 ngut ki dei kiba dang hapoh 18 snem ka rta bad kitei kiwei pat ki dei kiba naduh ka rta ba 19 haduh 22 snem.
La ong ba naduh ka por shuwa ban ioh kem ia kitei ki 9 ngut, ki don kiba la pharep ia ki samla phetwir kiba dei na kitei ki shnong ba ju shong ki phetwir.
Namar kane ka jingjia, ha ka Sngi Balang pat, kumba 6,000 ngut ki paidbah ki la mih sha ki surok bad ki lynti- synkien ban jong ka shnong Romansur-Isere, ka thaiñ ba don ka skul Thomas High School.
Ha ka Sngi U Blei, la mih kawei ka kynhun kumba 40 ngut ki briew kiba la ialum ha ka phang pdeng jong katei ka shnong hynrei ki pulit ki la lah ban tehlakam noh bad ki la pynra noh ia katei ka kynhun. Katba ha ka Sngi Saitjaiñ pat ki don da ki spah ngut kiba la ialum paidbah bad iaid kylleng katei ka shnong namar jong katei ka jingjia.
La ong ruh ba ki paidbah ki la poi shaduh u pud ban iakynad bad iakhun pyrshah ia ki pulit kiba ap pahara ha katei ka thaiñ ha ka Sngi Saitjaiñ bad bun ngut ki briew kiba la mynsaw ha katei ka jingiakynad.
Ki pulit ki la kem bad rah noh ruh ia 24 ngut kiba long ki nongialam bad nong pynshit ha katei ka jingialum paidbah.
