Shillong, Naiwieng 27
Ka kynhun ïalehkai kriket ka Jylla ka la shah pynkhyllem noh baroh hynñiew wiket bad ïoh 252 run ha ka sngi kaba saw bad kaba khatduh jong ka U-19 men’s Cooch Behar Trophy ha ka jingïakhun pyrshah ïa ka Nagaland ha madan ïalehkai jong ka MCA kaba ha Polo.
Haba bteng ïa ka pali ban tied na ki 120/3, na ka bynta ban kynjoh sha ki 335 run khnang ban khur ïa ka jingjop, ka Meghalaya ka la kamai tang 202 run bad pynlong ïa ka Nagaland ban ïoh ïa ka jingjop.
Kham hashwa ka Nagaland ka la lah ban kamai 245 run bad shah pynkhyllem baroh ki nongtied ha ka inning kaba nyngkong bad 319/4 ha ka inning kaba ar, katba ka Meghalaya ka la lah ban kamai 110 run bad shah pynkhyllem baroh ki nongtied ha ka inning kaba nyngkong.
Hasien ka jingïakhun kaba la neh, u Kishlay Vishlux u la shah pynkhyl-lem noh hadien ba u la kamai 36 na ki 141 bol. U Shavian Blah u la shah pynkhyllem noh hadien ba u la lah ban tied 21.
U Charm Marbaniang u la long sa uwei pat u rangïalehkai uba la lah ban tied 21 run. Kane ka la wan hadien ba u Rajesh Das u la lah ban pynhap wiket noh ïa u Charm. Hadien katto katne por u Das u la ïoh ban pynhap wket sa ïa kiwei pat ki nongtied ka Meghalaya.
Te kumta ka Meghalaya kan mih ha ka sngi Ba-ar na ka bynta ban pynkhreh ïa ka jingïakhun pyrshah ïa ka Sikkim ka ban long ha ka 1 tarik u Nohrah ha Rangpo.
