Vermont, Naiwieng:
Katkum ki khubor la ong ba ki bahaiing- hasem jong 3 ngut ki khynnah nong Palestine kiba la shah siat ha ka Sngi Saitjaiñ hapoh Vermont, ha ka Sngi U Blei ki la dawa ia ki heh ka United States ba ki dei ban phah wad bniah halor katei ka jingjia iashun jaitbynriew kaba la jia hapoh u pud- u sam jong ka US.
Kitei ki khynnah pule kiba shah siat ki kynthup ia u Hisham Awartani na ka Brown University ha Rhode Island, Kinnan Abdel Hamid na Haverford College jong ka Pennsylvania bad Tahseen Ahmed na ka skulbah Trinity College na Connecticut, ha kaba kitei ki khynnah baroh ki la shah siat hajan ka skulbah Vermont ha ka meit Sngi Saitjaiñ bad ha kane ka por ki dang shah sumar ha ki jaka sumar jong katei ka nongbah namar ki jingmynsaw ha katei ka miet.
Hynrei ki pulit ka Burlington kim shym la pynithuh ne pynshai eiei halor utei u nongsiat ne ki nongsiat kiba don kti ha katei ka kam.
Kumta, ki bahaiing jong kitei ki khynnah pule ki la dawa ia ki pulit bad ki bor ka aiñ jong ka United States ba kin phah wad bniah bad tohkit bniah haba iadei bad katei ka jingjia bad ba ki khun jong ki, ki dei ban ioh ia ka jingbishar kaba hok bad ba khuid naba ym dei ban ailad ia kum kitei ki runar kiba wanrah jingma ia ka jingim jong ki nongwei kiba leit shong ha kano- kano ka ri katkum ki kam- ki jam bad ki jingdonkam jongki.
Katei ka jingjia ha ka Sngi Saitjaiñ, ka long ruh ha kum kane ka por ba ka US ka la sakhi ia shibun tylli ki jingjia synreit kuli bad ki kam runar bapher naduh ba jia ka thma hapdeng ka Israel bad ki lehnoh Hamas.
Khlem da pynithuh ia ka kyrteng jong kitei ki khynnah ba shah siat ha katei ka jan miet Sngi Saitjaiñ, ki pulit ki la shu pyntip ba ia 2 ngut la sumar shuwa na katei hi ka jaka ba shah siat bad hadien kata pat la pynkit ia ki sha ka University of Vermont Medical Center da ka kynhu pynlip ding. Hadien kata, ki pulit ki la pynkit pat ia utei u khynnah uba 3 sha katei hi kajuh ka hospital naka bynta ki jingsumar kiba bniah.
