New Delhi, Naiwieng:
Ki la don kumba 20 ngut ki briew kiba la ïap na ka jingshah pom pyrthat bad ki jingthung jingtep ruh ki la shah pynjulor ha kiba bun ki thaiñ hadien ka jingwan jong u slap u bym dei por ha kaba kane ka la ktah jur ïa ka Gujarat ha ka sngi U Blei, la ïathuh ki heh ba dei khmih.
U Myntri jong ka tnat ki kam pohïing jong ka sorkar kmie u Amit Shah u la pynpaw ka jingsngewlem sha kito ki longïing kiba la duhnoh ïa ki baïeid-bathoiñ jong ki bad u la ong ba ki heh sorkar ha ka thaiñ ki la don bynta ban ai ki jingïarap.
“Nga da pynpaw ka jingsngewlem halor ka jingïohpdiang ïa ka khubor sngewsih ha kaba ki la don bun ngut ki briew kiba la ïap na ka daw ka jingthut jong ka suiñbneng bad ka jingshah pom pyrthat ha kiba bun ki jaka sor jong ka Gujarat. Nga pynpaw ka jingsngewlem halor ka jingduhnoh jong kine ki mynsiem ha kane ka jingjia kaba sngewsih. Ki heh sorkar ha ka thaiñ ki la don bynta ha ka jingai jingïarap, ka jingduwai na ka bynta ka jingïoh noh kham kloi ka jingkoit ka jingkhiah na ka bynta kito kiba la mynsaw,” la ong u Shah ha ka jingthoh kaba u la buh ha ka rynsan phah khubor ha X.
Kumba la ïathuh ka India Meteorological Department (IMD), la ong ba ka jinghap jong u slap uba jur la khmih lynti ba kan sa long ha ki sngi kiba bud ha kaba kane kan sa ktah jur ïa ki jaka kiba don ha ki bynta ba shaphang Shathie jong ka Gujarat bad Saurashtra distrik.
Katkum ka jingai jingkheiñ na ka State Emergency Operation Centre (SEOC) la paw shai ba ka jinghap jong u slap uba jur ka la long ha 234 tylli na ki 252 tylli ki thaiñ kiba don ha Gujarat ha ka sngi U Blei.
Ki distrik kum ka Surat, Surendranagar, Kheda, Tapi, Bharuch, bad Amreli ki la sakhi ïa ka jinghap jong u slap uba jur, ha kaba u la long naduh ka 50 haduh ka 117 mm hapdeng ki 16 kynta. Ka IMD ka la ong ba ka jingpaswut jong ka ‘erïong ka la long sha ki bynta ba shaphang Shatei-Mihngi jong ka Arabian Sea, ha kaba ka la ktah ruh ïa ki thaiñ kiba don ha Saurashtra bad Kutch.
