New Delhi, Naiwieng:
Ki shipai ïada khappud jong ka tnat Border Security Forces (BSF) ki la ïoh ban kurup kumba 69 tylli ki Drone jong ki nong Pakistan kiba la rung ha ki bynta jong ka ri India ha ki 10 bnai ba la leit jong une u snem, la ïathuh ka tyllong khubor.
Kumba la ïathuh ka tyllong khubor la ong ba na ka jingkhmih bniah na ka jingïohlum jingkheiñ la ong ba kiba bun na kine ki Drone ki dei kiba la don ïa ki dak shon “Made in China”, bad kiba la shah pynwandur kum ki Quadcopter kiba don ïa saw tylli ki Rotor ha kiba bun ki rukom.
Kumba la ïohlum jingkheiñ, la ong ba ki la don baroh kumba 69 tylli kiba kum kine ki Drone ïa kiba la ïoh ban kurup da ki shipai BSF hapdeng ka 1 tarik, Kyllalyngkot haduh ka 31 tarik, Risaw jong une u snem ha Western Border jong ka ri ïa kiba la pynïaid lyngba ki bynta jong ka Punjab, Rajasthan bad Jammu, la ong ka kaiphot ba la wan na ki lad phah khubor.
Kane ka jingïai bteng ha ka ban ïoh kurup ïa kine ki Drone ka long naba ki shipai ki la ïai bteng ban pynlong ïa ki jingleit pahara bad leit khmih bniah sha kylleng ki jaka.
Ki la don kumba 60 tylli ki Drone ïa kiba la ïoh ban kurup na Punjab katba 9 tylli la lap na ki bynta jong ka Rajasthan.
Ki la don baroh kumba 21 tylli ki Drone ïa kiba la ïoh ban kurup tang ha u Risaw, 19 tylli na Punjab bad ar tylli na ki bynta jong ka Rajasthan.
Ha kaba ïadei bad kane, ki la don kumba 11 tylli ki Drone ïa kiba la ïoh ban kurup ha u bnai Jylliew, 7 tylli ha u Rymphang, Naitung bad Nailur, 5 tylli ha u Nailar, bad mar 3 tylli ha u bnai Lber bad Ïaïong bad kawei ha u bnai Kyllalyngkot, la ïathuh ka tyllong khubor.
Kumba la ïohlum jingkheiñ la ong ba ki nongkhaïi tuh ki la jied da ki bynta jong ka Punjab ha India na ka bynta ban khaïi tuh ïa ki jingdih pynbuaid da kaba pyndonkam da ki Drone bad ïoh ban kurup ïa kine ki Unmanned Aerial Vehicles (UAVs) na Tarn Taran, Amritsar, Ferozpur, Gurdaspur bad Abohar distrik.
