Shillong, Naiwieng 27
U Shiva Thapa uba la khur takma hynriew sien ha ka Asian Champion-ship bad u rangïakura uba la khur ia ka takma ksiar ha ka Commonwealth Games 2022 u Amit Panghal, ki la lah ban pyni ïa ka mynsiem iakhun na ka bynta ban khur ïa ka jingjop ha ka sngi kaba lai jong ka 7th Elite Men’s National Boxing Cham-pionship kaba la long ha SAI Indoor Hall.
Ha kane ka jingïakhun kaba la long ha ka Lah Sngi U Blei, u Panghal na Services, uba long u lahduh ha ka Asian Games 2018, u la khur ïa ka jingjop ha ka flyweight 48-51kg hadien ba u la lah ban pynliem noh ïa u Shivaji na Maharashtra lyngba ka jingïarai lang da baroh ki nongbishar.
Kumjuh ha ka por janmiet u Thapa na Assam u la ïakhun tyngeh pyrshah ïa u Abhinash Jamwal uba na Himachal Pradesh ha ka light welterweight 60-63.5kg bad hapdeng kane ka jingïakhun u la lah ban khur ïa ka jingjop da 4-3.
Une u rangïakura na Assam u la ïoh ka jingkyrshan na kiba bun ki paidbah hynne ka sngi bad ha kaba kut u la lah ban khur ïa ka jingjop ha kane ka jingïakhun ha kane ka nongbah.
Ym lah ban len ba u Jamwal u la long u rangïakura uba tbit ha kaba um shym la ailad ïa u Thapa ba un shu jop suk. Hapdeng kane ka jingïakhun kaba itynnad, hynrei na ka liang ki nongbishar ki la rai jop ïa u Thapa na ka bynta ban pynhun ïa ki paidbah nongkyrshan.
Ïa kane ka lympung ïakura ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka Boxing Federation of India bad la kyrshan lang da ka tnat Sports and Youth Affairs jong ka Sorkar Jylla.
Kitei ki ar ngut ki khlur iakura ki dangdonkam ban ïalehkai bha ha kane ka lympung kaba long shi bynta kum ka jingpynkhreh na ka bynta ka Olympic Games namar ki rangïakura ki ban khur takma kin ïoh rung sha ka prokram kilanmet jong ka ri hashwa ba kin ïoh ïa ka lad ban leit sha ka lympung ïaknieh ka ban long ha Italy na ka bynta ban ïoh rung sha ka Olym -pics ka ban long ha Paris.
