Geneva, Naiwieng:
Ka tnat Human Rights Watch (HRW) ha ka Sngi U Blei ka la pyntip ba la ioh ksai halor ka jingbakla siat ia u ‘namding uba la leit bthei bad pynjulor ia ka hospital kaba don ha Gaza ha ka 17 tarik u Risaw, ha kaba bun ngut ki la khlad bad mynsaw na katei ka jingjia.
Katei ka jingbthei hapoh ka hospital Al-Ahli ka la wanrah ruh ia ka jingpynrem na kiba bun ki ri Muslim ha kylleng ka pyrthei, ha kaba ka Palestine ka la kynnoh ba dei ki shipai ka Israel kiba la ther bom sha katei ka jaka. Katba na ka liang ka Israel ruh ka la kynnoh ba dei ki lehnoh ka Palestine hi kiba la bakla siat pynbthei ia katei ka hospital kaba don hapoh u pud- u sam jongki.
Ka tnat ka koit ka khiah jong ka Gaza ha utei u bnai Risaw, ka la pyntip ba ki don haduh 471 ngut ki briew kiba la khlad na katei ka jingshah ther bom katei ka hospital ha Gaza. Katba ka tnat wad bniah jong ka United States ka la buh jingkheiñ antad ba kin don tang kumba 100 haduh 300 ngut ki ban shah ktah ne khlad ha katei ka jingjia.
Kumta, ka tnat HRW ha ka Sngi U Blei ka la ong ba katei ka jingshah ther bom ka hospital Al-Ahli Arab ha ka 17 tarik u Risaw, 2023, ka lah ban dei namar ka jingbakla leit her u ‘namding ba ju siat bad pyndonkam bha da ki kynhun lehnoh na Palestine.
Katei ka tnat ka la iathuh ruh ba kane ka kaiphod ba la iohlum ha kane ka por, ka long lyngba jong ki dur bad ki video kiba la ioh lum bad kiba la ioh ring lyngba ki kor- ki bor satellite ha ryngkat ruh ka jingioh ban iakren bad ki heh jong ki tnat wad bniah.
katei ka jingshah ther bom jong ka hospital Al-Ahli ka long kawei na ki jingjia kaba heh tam kaba la wanrah ia ka jingpynrem na kiba bun ki ri bad ki tnat bapher napdeng baroh kiei- kiei kiba la jia hapdeng jong ka jingiakhun thma jong ki lehnoh Hamas bad ka Israel hapoh Gaza.
Hynrei, na ka liang u nongialam ka kynhun lehnoh Hamas, u Basem Naim u la ong ba katei ka kaiphod ba la wanrah da ka tnat HRW ha kane ka kynti, ka long tang ban iada ia ka Israel bad ban pynda ia ki kam pynkheiñ aiñ thma jong ka Israel bad ka Hamas kam lah ban pdiang ia kane.
