New Delhi, Naiwieng:
Ka Congress hynnin ka sngi ka la kynthoh jur ïa ka BRS halor ka jingweng noh jong ka EC ïa ka jingai jingbit ïa ka sorkar Telangana na ka bynta ban siew ïa ka jingïarap pisa sha ki nong-rep kiba shah kynthup hapoh ka Rythu Bandhu Scheme, kumba la kynnoh, la ong ba kane ka la paw ba ka la long ka jingbym pyrkhat bad ka jingshakri jong ka seng ba la lamkhmat da u K Chandrasekhar Rao.
Kane ka jingkynthoh jong ka Congress ïa ka Bharat Rashtra Samithi (BRS) ka la long hadien ba ka Election Commission (EC) ka la weng noh ïa ka jingai jingbit ba la ai sha ka sorkar Telangana na ka bynta ban ïarap pisa sha ki nongrep kiba shah kynthup hapoh ka Rythu Bandhu Scheme kaba la long hadien ka jingpynkheiñ jong u Myntri ïa ka Model Code naba u la pynbna paidbah shaphang jong ka.
Ka kynhun EC ka la mynjur ïa ka sorkar jylla ba kan sam ïa ka pisa ba dang sah ha ka por ba la treikam ka Model Code of Conduct naba la don ki daw kiba biang.
Ka jylla ka la shah bthah ba kam dei ban pynpaw paidbah halor kane ka jingsam pisa namar ba ka dei ha ka por ba dang treikam ka Code ha kaba ïadei bad kane ka bynta.
Ha ka jingphah khubor lyngba ka rynsan X, u General Secretary jong ka seng Congress, u K C Venugopal u la ong, “Namar ka jingbym don ka jingkitkhlieh bad ka jingshakri jong ka seng BRS bad kumjuh u Myntri ba dei khmih u Harish Rao, hapoh ka jingpyntreikam u nongïalam jong u u KCR, ka ECI ka la kyntait ban ai jingbit ha ka ban sam ïa ka pisa kaba sah hapoh ka jingtreikam jong ka skhim Rythu Bandhu.”
“Kane ka pisa ka dei ka hok jong ki nongrep bad ki dei ban ïoh na ka bynta ka jingtrei shitom jong ki kaba long baroh shi snem,” u la ong.
