Egypt, Naiwieng:
Ka Hamas ha ka Sngi Nyngkong ka la pyllait biang sa 17 ngut kiba la shah rahbor ha katei ka kynhun naduh ka 7 tarik jong u Risaw ba la leit, kitei ki 17 ngut ki kynthup ia 9 ngut ki khyllung- khynnah, 4 ngut ki longkmie bad kumjuh ruh uwei u nong Russia ba la shong- la sah hapoh Israel.
Da kane, ka Hamas ka la dep ban pyllait haduh 63 ngut ki briew ba ka la rahbor naphang ha ka por ba ka leit ban thombor bad hiar thma ia ka Israel ha katei ka 7 tarik u Risaw jong une u snem 2023.
Kane ka khubor ka long ruh hadien ka jing iamynjur hapdeng ka Israel bad ka kynhun lehnoh Hamas ha ka Sngi Thohdieng jong ka taiew ba la lah, halor ka jingiakut ban ia pyllait noh ia 50 ngut ki briew ba la shah rahbor na Israel bad kumjuh ruh ka Israel kan pyllait noh ia 150 ngut ki nong Palestine kiba la shah kem bad shah bat ha ka Israel naduh ki por ba la leit. Hynrei ka Israel ka la pynbeit ban sangeh ia ka thma tang ha kine ki 4 sngi katba ka Hamas ka dang pyllait ia kitei ki briew kiba ka rahbor na Israel. Kumjuh ruh katba ki lehnoh Hamas ki dang pyllait ia kitei ki nong Israel ha kine ki 4 sngi, ka Israel ka la ailad ruh ia ki tnat bad ki ri bapher ba kin pynpoi ia ki lad jingiarap jongki lyngba ka Egypt bad ba yn pynkit bad pynpoi pat ia ki sha ki paid nongshong shnong ka Palestine hapoh Gaza.
La ong ba ki Hamas ki la sdang pyllait ia 13 ngut ki briew ha ka Sngi Thohdieng bad kumjuh ruh ha ka Sngi Saitjaiñ, bad kumba la iakut, ka Israel ruh ka la pyllait noh shwa ia 39 ngut ki nong Palestine kiba la shah set ha Israel bad kumjuh la pyllait biang ia ki 39 ngut ha katei ka Sngi Saitjaiñ kumba la leh ka Hamas.
La ong ba utei u nong Russia uba la long noh ruh u nongshong shnong ka Israel, ha ka jingshisha um shym ïadon bynta eiei bad katei ka jingiakut ban pyllait briew kumba la iakren hapdeng ka Israel bad ka kynhun lehnoh Hamas, hynrei ka Hamas ka la pyntip ba la pyllait lem noh ia utei u briew nong Russia namar ka jing iai- ban jong u President ka Russia- u Vladimir Putin man ka por ban pyllait bad ban ym ktah ia ki nong Russia kiba don ha Israel.
Ha kajuh ka por ruh la ong ba ka Hamas ka la pyllait noh sa ia 3 ngut de kiwei pat ki nong Thailand ha ka Sngi U Blei. Tad haduh kane ka step Sngi Nyngkong, ki la don 14 ngut ki nong Thailand bad uwei u nong Philippines ba la pyllait noh da ka Hamas.
