Shillong, Naiwieng 27
U Bhalang Shadap u la long sa uwei pat u rangïakura ka Jylla uba la khur ïa ka jingjop ha ka sngi kaba lai jong ka 7th Elite Men’s National Boxing Championship kaba dang ïaid mynta ha SAI Indoor Hall.
Kane ka la wan hadien ba u la lah ban pynliem noh ïa u Enait Khan jong ka DNHDD (Dadra & Nagar Haveli, Daman & Diu) ha ka welterweight 63.5-67kg ha ka Lah Sngi U Blei.
Ha kane ka jingïakhun la wan ban ai jingkyrshan da ki khynnah jong ka shlem ai jinghikai jong ka SAI kaba don ha NEHU lem bad kiwei pat, kiba la pyrta bad risa na ka bynta ban ai mynsiem ïa une u rangïakura.
Kumba ka paw u Bhalang u la lah ban ïalehkai bha naduh kaba sdang ha kaba um shym la ailad ïa u rangïakura ka liang pyrshah. Une u rangïalehkai ka Jylla u la lah ban pyni ïa ka jingkhlaiñ bor ban thom naphang da kaba u la ïoh ban kura bunsien ïa u rangïalehkai ka liang pyrshah. Dei ha ka wat jingïakhun kaba ar ba u rephri u la hap ban pynsngeh noh ïa kane ka jingïakhun hadien ba u Khan u la mynsaw.
Kumba ka long mynta u Bhalang u la long ba ar napdeng ki rangïakura ka Jylla ban jam sha ka wat ba-ar kata hadien ba u Badonkupar Synnah (light welterweight 60-63.5kg) u la khur ïa ka jingjop ha ka Sngi U Blei pyrshah ïa u Roopesh Shukla uba na Madhya Pradesh ha ka light welterweight 60-63.5kg.
Kum ban shu pynkynmaw u Bhalang bad u Badon ki dei kiba dang shah pyntbit napoh ka shlem ai jinghikai jong ka SAI kumba phra snem kynthih. Kumta la khmih lynti ba kin dang ïai bteng ban ïalehkai bha ha kiwei pat ki wat ïakhun.
Kham hashwa ki la don ar ngut kiwei pat ki rangïakura ka Jylla, hynrei ki la mad noh ïa ka jingshah rem. U Melvin Malngiang ha ka featherweight 54-57kg bad u Sanjeev Maskut ha ka 46-48kg, ki la shah rem noh ha u Himanshu Srivas bad u Ram Naresh Patel, kiba la mihkhmat na Madhya Pradesh. Baroh ar ngut kitei ki rangïakura ka Jylla ki la ïakhun tyngeh, hynrei kane ka shong ha ka rai jong ki nongbishar pyrshah ïa ki.
Watla ka Jylla ka la sei ia 9 ngut ki rangïakura sha kane ka lympung, hynrei haduh mynta ki dangsah sa tang ar ngut ki ban ïakhun sa ïa ka wat kaba ar.
