Nongpoh, Naiwieng 27
Ka lympung ïalehkai kynjatbol ba la pynïaid da ka Mawlasnai Sports Club kaba la tip kum ka E.K Mawlong Memorial Football Trophy mynta ka la poi sha ka Pre-Quarter Final ha kaba ka Shillong Lajong kan ïakhun pyrshah ïa ka GFC Border Bhutan ha ka sngi Balang.
Kane ka jingïakhun kan long ha ka madan ïalehkai jong ka shnong Mawlasnai ka ban sdang ha ka por 1:30 nohphai sngi.
Kumban shu pynkynmaw, ïa kane ka lympung ïalehkai kynjatbol ka ban pynsahnam kyrpang ïa uwei na ki radbah ka saiñ hima sima ka Jylla, u Bah E.K Mawlong (bam kwai ha dwar U Blei) la wan ban plie paidbah da u MDC ka Karbi Anglong Autonomous Council (KAAC) ha ka jingïadon ryngkat jong u Bah Eugeneson Lyngdoh, MLA barim ka Maw-phlang, u Bah Andrew W. Lyngdoh, khun jong u Bah E.K Mawlong lem bad kiwei kiwei ki ‘riew rangbah bad ‘riew pawkhmat ka thaiñ ha ka 13 tarik mynta u bnai.
