Ghaziabad, Naiwieng:
Kumba la ïathuh ka tyllong khubor, la ong ba u Myntri khynnah jong ka State for Social Justice and Empowerment bad u President jong ka Republican Party of India (A) u Ramdas Athawale hynnin ka sngi u la dawa ïa ar tylli ki Lok Sabha konstitwensi ha Maharashtra na ka seng BJP.
U Athawale shen un sa leit ban ïakynduh ïa u President jong ka seng BJP u J P Nadda bad ïa u Myntri ka sorkar kmie uba dei khmih ïa ka tnat pohïing u Amit Shah na ka bynta kane ka jingkyrpad.
Ha ka jingïakren bad ki nongthoh khubor, u Ramdas Athawale u la ong, “Nga buh ka jingkyrpad ïa ka seng BJP ba ka seng jong ngi ka RPI ka kwah ban ïakhun ïa ka ilekshon Lok Sabha ha Maharashtra bad ha kaba ïadei bad kane, ngan sa leit ban ïakynduh ïa u Amit Shah bad ïa u JP Nadda bad ynda poi ka por, ngan sa leit ban ïakynduh ïa u Myntri Rangbahduh u Narendra Modi,” la ïathuh ka tyllong khubor.
“Ka seng jong nga ka Republican Party of India (A) ka la trei ha baroh kawei ka ri bad ka la don bynta bad ka kynhun ‘Mahayuti’ ha Maharashtra bad ka la dei ban ïoh ar tylli ki Lok Sabha konstitwensi ha ka jylla. Ngan sa thoh ïa kum kane ka shithi sha u President jong ka seng BJP u JP Nadda ji bad ban sa ïakren sani bha bad u,” la ong u Ramdas Athawale ha ka jingïakren bad ka kynhun ki nongthoh khubor.
U Ramdas Athawale shuh shuh u la ong ha ki nongthoh khubor kumne, “Nga la kwah ban wan sha Lok Sabha bad nga nalade nga la kwah ban ïakhun ïa ka ilekshon Lok Sabha na ‘Shirdi’ konstitwensi, lada ka seng ka ïoh sa ka Solapur kum ka Lok Sabha konsittwensi kata ka Republican Party kan sa ïoh ar tylli ki konstitwensi.
