“Ka jingïai phikir bad jingïai imsngi kaba man la ka khyllipmat ka long ka dor jong ka jinglaitluid,” kane ka long ka jingong bastad ha ka ktien phareng.
Kane ka jingmaham ka long kaba donkam eh ba man la ki khep ha ka jingim u briew. La ha ki kam ïing kam sem ne ha ki kam kiba ïadei shimet, la ha ka khaïi ka pateng ne ha kano kano ka liang donkam ban im sngi khnang ba ngin ym ïap ne shah thok bad shu lut ksan ei. Kumjuh ruh ha ka saiñ pyrthei katei ka jingmaham ka long kaba donkam eh. Ka sain pyrthei ka ktah ïa ka jingim, ka jingioh jingkot ka jingroi jong ka jaidbynriew bad kumta ter ter. Lada ngim plie ïa la ki khmat bad im sngi kyndong, ha ka jaka ba ka saiñ pyrthei kan long, ka lad ban pynim ïa ngi kan kylla long pynban ka bih ban pynmynsaw ïa ngi. Ngim lah baroh ban leit sha ka Dorbar Thaw Ain ban shna ïa ki aiñ ki ban ïarap bad kyrsiew ïa ka jaidbynriew, hynrei ngi don ki nongmihkhmat kiba ngi la jied. Kumta ka shong ha ngi u paidbah ha man la ki san snem ba ngi dei ban jied ïa kine ki nongmihkhmat. Dei ruh ha man la ki san snem ba ki nongmihkhmat jong ngi ki ïeng hakhmat jong ngi u paidbah ban shah bishar bad ban ai jingkheiñ ba ki la leh aiu hapoh ki san snem naduh ba la jied ïa ki. Kumta ngi iohi shisyndon ba kine kiba ngi jied ki bat ïa ka bor bad ki bah khala ïa ka ïap ka im jong ngi kita ki ban bah khala ia ka ïap ka im jong ngi namarkata, ki dei ban long kiba shisha. Bunsien ngi u paidbah ngi ju liat ha ki ktien jali jaum, ha ki ktien ha ki ktien khroh bad ngim da puson bha ba ïa uba kum uno uba ngi dei ban jied bad ban pynshet ïa ka jingkit ka ri, ngi ju shah ïalam barabor tang da ka jingsngew hynrei yum da ka jingpyrkhat rangbah. Ngi ju shah ïalam ruh ha ki jingsngew liang khlem da thew tarajur bha. Kumta ngi u paidbah ngim lah ban kynnoh ïano ïano hynrei dei ïa ngi hi ban kynnoh lada haba ngi jied bakla ïa ki nongmihkhmat jong ngi. Ngi sniew bok shibun ba ha ka ri Khasi jong ngi, ki seng kiba ngi don ki long tang ki jingïakynduh ki katto katne na ka bynta ban ïaleh election.
[U Nongsaiñ Hima, 1987]
