Shillong Naiwieng 28
Ka Laitkyrhong SC bad ka Marbisu SC ki la khur ïa ka jingjop ha ka lympung ïalehkai SSA 2nd Division Football League 2023 ha ka sngi Ba-ar ha SSA Stadium, Polo.
Ha ka jingïakhun kaba nyngkong ka Laitkyrhong ka la pynliem ïa ka Smit SC da 3-0 kol bad kane ka la wan lyngba u Banshaibok Khongsngi uba la khur ïa ka hat-trick.
Ha kane ka jingïakhun baroh ar ki kynhun ki la ïakhun tyngeh naduh kaba sdang. Hynrei hashwa ban kut ka jingïalehkai jong ka kylla step ba ka Laitkyrhong ka la ïoh ban pynkhih jar nyngkong lyngba u Banshaibok Khongsngi ha ka minit kaba 43.
Utei u rangïalehkai shakhmat u la bteng ban ïakhun tyngeh ha ka kylla miet ha kaba u la ïoh ban thep biang ïa ka kol kaba ar ha ka minit kaba 61. U Banshaibok u la khur syndon ïa ka hat-trick hadien ba u la ïoh ban thep biang ïa ka kol kaba lai ha ka minit kaba 72 na ka bynta ban khur syndon ïa ka jingjop.
Haba phai sha kawei pat ka jingïakhun kaba ar, ka Marbisu SC ka la pynliem noh ïa ka Nongkrem SC da 4-0 kol bad u Rijied Sun u la khur ïa ka hat-trick.
Tang mar ïasdang ka jingïalehkai u Rijied u la pynkhih jar nyngkong eh na ka bynta ka Marbisu ha ka minit kaba 8 na ka bynta ban tam shi kol ha ka kylla step.
Hadien ba la bteng biang ïa ka jingïakhun jong ka kylla miet, u Rijied u la ïoh ban thep biang sa ar kol (61 & 80) na ka bynta ban khur syndon ïa ka hat-trick. Ïa ka kol kaba khatduh la thep da u Seiborlang Nongbri ha ka minit kaba 80 na ka bynta ban khur syndon ïa ka jingjop.
Ka jingïalehkai ha ka sngi Balang kan long hapdeng ka Sohïong SC pyrshah ïa ka Laitlyngkot SC ha ka por 11:30 mynstep, katba ka Mawtawar SC ïa ka Jongksha SC ha ka por 2:30 janmiet.
