Lucknow, Naiwieng:
Ha ryngkat ka jingïatreilang halor ki hukum jong ka sorkar Uttar Pradesh, ki pulit jong ka Kanpur ki la weng noh ïa ki 300 tylli ki tynghung ïa kiba la lap ba ki la don ki jingpynkheiñ ïa ki kyndon ba la buh ha ka por ba la don ka jingpyntreikam ban khmih bniah kaba la sdang naduh ka 26 tarik, Naiwieng.
Ka jingpyntreikam jong ki pulit ka Kanpur ka la long hadien ba u Myntri Rangbah jong ka Uttar Pradesh u Yogi Adityanath u la phah ïa ki hukum ba la dei ban weng noh ïa ki tynghung bad kiwei pat ki kor pynsawa ïa kiba la pyntreikam beaiñ bad kito kiba la ïaid lait na ki kyndon ba la buh.
Ha kawei na ki Video, ki nongïalam niam jong ki Hindu bad Muslim la ïohi ba ki la weng ïa ki tynghung bad ki kor pynsawa na ki jaka mane blei jong ki ha ryngkat ka jingdon jong ki pulit.
Kiba bun na ki nongïalam niam na kylleng ki jaka jong ka nongbah ki la weng ruh ïa ki kor pynsawa dalade haba ki la ïohi ïa ka kynhun jong ki pulit ka Kanpur kaba la pyntreikam na ka bynta ka jingkhmih bniah halor ka rukom buh ïa ki kor pynsawa.
Kane ka dei ka jingpyntreikam ha kaba ki pulit ki la ïoh ban weng ïa kumba 300 tylli ki tynghung bad ki kor pynsawa na kiba bun ki jaka mane blei jong ki Hindu, Muslim bad jong kiwei pat ki jaka mane blei kiba don ha kylleng ka nongbah.
Ha u bnai Ïaïong jong u snem ba la dep, ka sorkar jylla ka la pynlong ïa kum kane ka jingpyntreikam na ka bynta ban weng noh ïa ki kor pynsawa na kiba bun ki jaka mane blei na kylleng ki jaka jong ka jylla.
