Shillong, Naiwieng 28
Ki ar ngut ‘rang ïakura ka Jylla ki la mad ïa ka jingshah rem ha ka pre-quarter jong ka 7th Elite Men’s National Boxing Championship, hynrei ki la lah ban pyni ïa ka mynsiem ïakhun hakhmat ki paidbah nongkyrshan.
Kine ki kynthup ïa u Badonkupar Synnah bad Bhalang Shadap, kiba la khur jingjop ha ka wat kaba nyngkong myn ha ka Sngi U Blei bad kumjuh ha ka Lah Sngi U Blei.
Wat la ka jingïaid lynti ki ‘rang ïakura ka Jylla ka la poi sha kaba kut, pynban ki dangdon bun ki khlur ïakura jong ka ri ki ban dang ïai bteng ha kane ka lympung na ka bynta ban ïaknieh bad khur jingjop.
Kane ka lympung ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka jingïatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla, ha SAI Indoor Hall.
Ki la don haduh 104 tylli ki bout ha kaba ki ‘rang ïakura ki la pynkhreh ïa lade na ka bynta ki jingïakhun bad kumjuh ki nongkitkam ka BFI, ha ryngkat ka jingtrei shitom ki dkhot nongkitkam ka MBA, kumjuh ka tnat Sports and Youth Affairs lem bad kiba bun ki volunteer kiba la don bynta ban pynïaid beit ïa kane ka lympung ïakura.
U lahduh ha ka Asian Games 2018 u Amit Panghal na ka Services u la khur jingjop ha ka flyweight 48-51kg fight pyrshah ïa u Jayshandeep Singh na ka Punjab. Hapdeng kane ka jingïakhun u Panghal um da hun mynsiem halor kane ka rukom ïalehkai ka jong u.
Hadien kata, u ‘rang ïakura na Assam u Shiva Thapa, uba la khur ïa ka takma ksiar ha ka aïom ba la dep, u la ïakhun pyrshah ia u Santhosh HK uba na Karnataka ha ka light welterweight 60-63.5kg. Kumba long hynnin ka sngi, u Thapa u la lah biang ban khur ïa ka jingjop lyngba ka jingïarai lang da baroh ki nongbishar.
Haba phai sha ki ar ngut ki nongïakura ka Jylla ki la pyrshang ban ïalehkai bha da ka jingkhmih lynti ban ïai bteng ïa ka jingjop, hynrei ha kaba kut ki la mad ia ka jingshah rem.
U Synnah, ha kajuh ka ka kyrdan ïakura jong ka light welterweight kumba long u Thapa, u la ïakynduh pyrshah ïa u Harsh Vardhan Joshi uba na Uttarakhand. U Synnah bad u rangïakura ka liang pyrshah, ki la ïakhun tyngeh haduh ka wat kaba lai, hynrei ha kaba kut u Joshi u la lah ban tam point ïa utei u rangïakura ka Jylla.
Haba phai sha u Bhalang Shadap, ha ka welterweight 63.5-67kg, u la ïakhun pyrshah ïa u Parlad Singh uba na Punjab, uba don ïa ka rynïeng kaba jrong ban ïa utei u rangïakura ka Jylla. Watla katta u Shadap u la ïoh ïa ki kabu kiba biang, hynrei ha kaba kut u Parlad u la khur ïa ka jingjop lyngba ka jinglah ban kamai bun point.
