New Delhi, Naiwieng:
Ka Election Commission of India ha ka Lah Sngi U Blei ka la phah da ka shithi sha ka sorkar Karnataka hapoh ka jingïalam jong u Siddaramaiah namar ka jingpynbna ïa kiba bun ki skhim ai jingmyntoi bad ki jinglah pyntreikam jong ka sorkar ha ki kot khubor ha ka jaka ka ban sa pynlong ïa ka ilekshon ha Telangana ha kaba la ong ba kane ka long shi bynta ka jingpynkheiñ ïa ka Model Code of Conduct.
“Ka Commission ka la pynshisha da kaba ong ba kiba bun na ki jingpynbna ba la pynbna ha kaba ïadei bad ki skhim ai jingmyntoi bad ki jinglah treikam jong ka sorkar kmie bad ka sorkar jylla ki dei kiba la pynmih da ki katto katne ki sorkar jong ki jylla bym pynlong ilekshon, ha ki kot khubor kiba ha ki jylla ki ban pynlong ïa ka ilekshon. Na ka liang ka Commission ka la ñiew ïa kane ba ka dei ka jingpynkheiñ ïa ki kyndon jong ka Model Code of Conduct,” la ong ka ECI.
Ka ECI ka la ong ba ka la ïoh jingtip halor kane lyngba ka seng BJP kaba la phah ïa ka jingthoh kaba 27 tarik, Naiwieng bad da ka seng Bharat Rashtra Samithi (BRS) lyngba ka jingthoh kaba don ïa ka tarik kaba 25 tarik, Naiwieng ha kaba la tip shai ba ka sorkar Karnataka ka la pynmih ïa ki jingpynbna jong kiba bun ki skhim bad ki jinglah pyntreikam jong ka sorkar ha Telangana ha ka 24-27 tarik, Naiwieng jong u snem 2023 ha ka jingpynmih ha kiba bun ki kot khubor ha Hyderabad.
Ka Commission shuh shuh ka la ong ba ha ki por ba la leit, baroh kine ki jingpynbna, ïa kaba la pyllait da ki sorkar jong ki jylla bym pynlong ilekshon ha ka por ba la pyntreikam ïa ka Model Code of Conduct yn sa phah sha ka Commission na ka bynta ka jingpynshai hashwa ban phah na ka bynta ka jingpynbna paidbah ha ki kot khubor ne hashwa ban sam jingthoh sha ki jylla ba pynlong ïa ka ilekshon.
