Shillong, Naiwieng 28
Ka Al-Nassr ka la jam sha ka pre-quarter final jong ka AFC Champions League 2023-24 hadien ba ïakhaid khlem don ba thep kol pyrshah ïa ka kynhun kaba na Iran ka Persepolis.
Ha kane ka jingïakhun kaba la long ha ka Lah Sngi U Blei ha Milad Sarlak, ka Al-Nassr ka la ïalehkai tang shiphew ngut ki ‘rang ïalehkai hadien ba u Ali Lajami u la shah sei da ka red card ha u rephir na ka daw ka jingïaleh pyrshah ha ka minit kaba 17.
Lyngba kane ka jinglah ban kamai ïa ka shi point ka la pynlong ïa ka Al-Nassr ban bat ïa ka kyrdan ba hakhlieh na ka Group-E watla dangsah sa shisien ïakhun.
Ha kane ka lympung ki dei tang ki kynhun ki ban khur jingjop ha kawei pa kawei ka group ki ban ïoh rung sha ka pre-quarter final. Ka Persepolis ka lah ban wan ha ka kyrdan ba-ar lada ka lah ban pynliem ïa ka Al-Duhail ha ka jingïalehkai kaba khatduh jong kane ka group ka ban long ha ka 5 tarik u Nohprah.
Kham hashwa ka Al-Nassr ka la ïoh ïa ka penalty ba la shut da u Cristiano Ronaldo hynrei ka la lait sharud. Ka Al-Nassr ka la ïakynduh jingeh ha kane ka jingïakhun ha la ïing hadien ba ka Persepolis ka la ïalehkai bha ha ka kylla miet.
Hapdeng kane ka jingïakhun, ka Persepolis kam shym la ïoh ban pynkhih jar. Te kumta ka Al-Nassr ka la lah ban pynurlong na ka bynta ban jam sha kawei pat ka wat jingïakhun jong kane ka lympung.
Te kumta u Ronaldo lem bad ki para nongïalehkai ka Al-Nassr ki la khmih lynti ban ïai bteng kum ka kynhun kaba khlem pat shah rem ha kaba kan leit phai sha ka Saudi Pro League ban ïakhun pyrshah ïa ka Al-Hilal ha ka sngi Thohdieng. Ka Al-Hilal ka dei ka kynhun kaba la bat ia ka kyrdan ba hakhlieh duh jong kane ka lympung bad tam da saw point ïa ka Al-Nassr.
