Sydney, Naiwieng:
Ka sorkar Australia ha ka Sngi Nyngkong, ka la beh kam noh ia uwei u nongtrei sorkar hadien ba la lap ia ki jingiakren jong u lyngba ka ‘WhatsApp’ kiba u la phah sha ki heh saiñ pyrthei jong ka ri.
U Michael Pezzullo u la shah pynhiar shuki bad shah pynsangeh noh na ka kam ba u bat kum u khlieh ka tnat Pohïing hadien 2 bnai ba la phah wad bniah ia ka jingdon kti jong u ha ki kam pynphriang jingtip beaiñ.
La ong ba u Pezzullo u la ïadon bynta ha ki kam be-aiñ ba sop-sop na ka bynta ki jingioh nong ba shimet jong u ha ryngkat bad kitei ki heh kiba iadei kam bad u.
Namarkata, u Myntri Rangbahduh ka Australia u Anthony Albanese ha katei ka sngi, u la pyntikna ba la pynhiar shuki noh mardor ia utei u heh jong ka ri hadien ba la lap ia kitei kam be-aiñ jong u.
U Pezzullo u la shah bat noh naduh u Nailur hadien ba la shem ia kitei ki jing-iakren jong u bad kitei ki heh ba iadei kam bad u lyngba jong ka ‘WhatsApp’.
Ha kawei na ki jing-iakren jong utei u heh bad ki heh jong kawei pat ka seng, la ong ba u Pezzullo u la kyntu ba kin wanrah ia ka ‘Right Winger’ namar u long u Myntri uba iadei ruh ha ka liang ban khmih ia ki nongrung- nongmih shapoh ri bad ka jing-rung- jingmih jong ki phetwir.
