Wellington, Naiwieng:
U Myntri Rangbahduh bathymmai ka New Zealand- u Christopher Luxon ha ka Sngi Nyngkong u la ong ba ka sorkar bathymmai kan pynsangeh treikam noh ia ki aiñ kiba khang ia ka jingdie duma bad jingdih duma hapoh ka ri. Kane ka khubor ka long ruh ka jingai mynsiem ia ki karkhana pynmih duma ha kylleng jong ka ri New Zealand kiba ka kam khaïi duma jong ki ka la sdang hiar noh naduh ba la thaw ia katei ka aiñ da ka sorkar barim.
Kumta ki heh ka koit ka khiah bad kiwei de ki riew shem phang hapoh ka ri New Zealand ki la ïaroh bad pdiang sngewbha ia katei ka jingpynbna jong u Myntri Rangbahduh ka ri ha katei ka sngi.
Hadien ba u la pynbna ia katei ka khubor ha ka Sngi Nyngokng, u Luxon u la pyntikna ba ka New Zealand kan pynduh- pyndam noh ia kitei ki kyndon aiñ hashwa ban wanrah bad pyntreikam ia ki namar la ong ba ka iew ‘Black Market’ ka la hiar bad ka donkam ban pynkiew ia baroh ki liang khaïi- pateng hapoh ka ri naka bynta ban kyntiew ia ka ioh- ka kot jong ka ri.
Kumta, ha katei ka jingialang ba la pynlong ha katei ka sngi, u Luxon u la ong ba ka jingkhaïi ia u duma ruh ka long kawei na ki lad ban kyntiew ia ka khajna bad ka ioh- ka kot jong ka ri hadien- habud.
Katba ka tnat Health Coalition Aotearoa jong ka New Zealand ka la ong ba katei ka jingthmu jong ka sorkar thymmai ka long ka jingleh beiñ ia la ka jong ka ri.
Ha kajuh ruh ka por la ong ba katei ka rai jong ka sorkar ba thymmai kan long ka jingduh nong kaba khraw ia ka koit- ka khiah jong ki paidbah, hynrei ka long pat ruh ka jingjop kaba khraw ia ki karkhana pynmih duma.
