Kuala Lumpur, Naiwieng:
U Myntri Rangbah ka Malaysia, u Anwar Ibrahim ha kane ka kynti u la pynbna ba ka Malaysia kan sam ‘Visa’ ei sha ki nongshong shnong jong ka China bad India bad ki paidbah kiba leit sha Malaysia ha katei ka por ba la buh, kin ioh ban sah ei haduh 30 sngi. Kane ka hukum kan sdang treikam naduh ka 1 tarik u Nohprah, 2023.
U Anwar u la pynbna ia kane ha ka miet Sngi U Blei haba ai jingkren ha ka People’s Justice Party Congress hynrei um shym la pynshai pat ba haduh katno katei ka jingsam ‘Visa’ ei kan dang treikam.
Namar la ong ba ka China bad India ki long ki ri kiba ju iadei kam bha bad ka Malaysia bad ki long ruh ki ri kiba kyntiew bun ia ka iew khaïi- pateng jong ka Malaysia. Na kane ka daw, ka Malaysia ka sngew dei ban leh ia katei ka kam kum shi bynta ban pynpaw ia ka jingsngew burom bad ka jinglong jan jong ka ia kine ki 2 tylli ki ri kiba ju kyntiew ia ka ioh- ka kot jongka lyngba ka khaïi- ka pateng bad ha kiwei ruh ki liang bapher.
Katkum ka kaiphod ba la ioh buh jingkheiñ da ka sorkar Malaysia, ki don haduh 9.16 Million ngut ki nongleit jngoh kai pyrthei kiba leit ruh sha Malaysia hapdeng u Kyllalyngkot haduh u Jylliew jong une u snem, ha kaba 4,98,540 ngut ki dei kiba na China bad 2.83.885 pat na India. Kane ka jingkheiñ ka bud ruh thik kumba long ha u snem 2019 ha kaba ki don haduh 1.5 Million ki nongleit jngoh kai na China bad 3,54,486 ngut na India hapoh jong utei u snem baroh shi snem.
Kane ka rai jong ka sorkar Malaysia ha kane ka kynti, ka long ruh thik kumba la dep pynbna da ka sorkar Thailand. Katba ka Thailand pat ka leh ia kane naka bynta ban kyntiew ia ka kam jngoh kai pyrthei jongka khamtam haba ka ioh – ka kot jong katei ka ri ka shong na katei ka bynta.
