Shillong, Naiwieng 29
U Myntri Rangbah ka Jylla u Conrad K. Sangma u la pynpaw ïa ka jing-angnud ba ka Sorkar Jylla ka don ïa ka thong ban ïohi ba ki nongïalehkai ka Jylla kin ïoh ban ïashim bynta ha ka Olympic ha kine ki khyndiat snem ki ban wan.
Ïa kane u la pynpaw ha ka jingwan sakhi ïa ka lympung ïalehkai 7th Elite Men’s National Boxing Championship kaba dang-ïaid mynta ha SAI Indoor Hall kaba ha NEHU.
Ha kane ka sngi, u Myntri Rangbah u la ïoh ban ïakren ruh bad ki khlur ïalehkai kiba danghap ban pynkhreh mynta ban leit sha ki lympung ïaknieh rung sha ka Paris Olympic ka ban long ha u snem ban wan.
U Conrad u la ong ban kynjoh sha kane ka thong, ka Sorkar ka la pynkhreh ban bei tyngka na ka bynta ban sei ïa ki nongïalehkai lyngba ka Elite bad ka Super Elite Pathway Pro-gramme ban khmih bniah ïa ki khynnah ïalehkai kiba don ïa ka jingtbit ha kino kino ki jait jingïa-lehkai bad ruh ban ai jinghikai pura ïa ki.
Kane ka lympung ka ban kut ha ka 1 tarik u Nohprah, la pynlong da ka Meghalaya Boxing Asso-ciation ha ryngkat ka jingïatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla.
“Ka long ka jingkmen kaba khraw na ka bynta jong ngi ban ïoh pynlong ïa kum kine ki lympung ïalehkai ha ka nongbah Shillong. Ka Sorkar jong ngi ka ai jingkyrshan pura na ka bynta ki lympung ïalehkai ki ban pynlong ïa kum kine hapoh ka Jylla,” la pynpaw u Sangma.
“Ki jingeh ki don ha kum kine ki khep namar ngi ïoh ban pynlong ïa kane ka lympung. Ngin ïai bteng ban nangpynjanai bad kyrmen ba ngin lah ban pynlong sa ki lympung ïalehkai bari ri (international events).”
“Ka long kaba kongsan ban khmih bniah ïa ki jingïalehkai kiba kyrpang bad ban ai jinghikai pura ïa ki khynnah bad ngi donkam ban pynthikna ba ki khynnah ïalehkai jong ngi kin long kiba tyngshaiñ,” la ong u Myntri Rangbah.
Haba pynpaw sha ki nongïakura, u Sangma u la ong, “Ka jingïatrei lang kum ka kynhun ban pynurlong ïa kane ka lympung hapdeng ka MBA, BFI bad ka tnat ïalehkai. Nga kyrmen ba phin rah ïa ki khubor kiba bha haba phi mih noh na kane ka Jylla.”
Shuh shuh u Sangma u la ïakynduh ruh ïa ki khlur ïakura kum u Shiva Thapa bad u Amit Panghal, lem bad ki khlur ïakura barim jong ka ri kiba la long mynta kum ki coach na ka Jylla kata u Torak Kharpran lem bad ka Roshni Bhusal. Na ka liang ka MBA ka la ai sngewbha ïa u Myntri Rangbah da shijur ki boxing gloves.
Na ka liang uwei na ki dkhot ka BFI u S.K Shandil, u la ai jingïaroh halor ka jinglah ban pynbiang nadong shading bad ruh ka jingpynlong ïa kane ka lympung. U la pynpaw ka jingkyrmen ba kum kane ka lympung kan long ka jingai mynsiem ïa ki nongïalehkai ka thaiñ shatei lammihngi ba kin shim khia ha ka kam ïakura.
