Shillong Naiwieng 29
Kum shibynta ban pyn-khreh ïa ka Meghalaya Games ka ban sa long ha Tura, ka Sorkar Jylla ka la lum ïa ka jingïalang ha kaba la donlang u Myntri Rangbah u Conrad K Sangma lem bad u Myntri ka tnat ba peit ïa ki kam ïalehkai u Bah Shakliar Warjri nalor ki ophisar bad ki nongkitkam ka Meghalaya State Olympic Association.
Haba kren sha ki lad pathai khubor hadien ka jingïalang, u Myntri Rangbah u la ïathuh ba ki Deputy Commissioner na ki district bapher bapher ruh ki la ïashimbynta lang lyngba ka online meeting.
U Myntri Rangbah u kubur ba ki don ki jingeh namar ym pat biang ki jaka ban pynlong ïa ki jingïalehkai hynrei katba lah, ka Sorkar kan pynbiang ïa ki jingdonkam ha ka por kaba biang.
U la ong ba kam long kaba suk ban pynlong ïa ka Meghalaya Games namarba ha nongbah Tura ki jaka kim pat da biang ha kaba nongïalehkai ruh ki don da ki hajar ngut bad hap pynbiang na ka bynta jong ki bad na ka bynta ki nongsynran ïa ki nongïalehkai.
Kumta u la ong ba ka Sorkar kan lum biang sa kawei ka jingïalang ha Tura ha 8 tarik Nohprah ha kaba ma u lem bad u Myntri ka tnat ba peit ïa ki kam ïalehkai kin sa donlang biang ha ryngkat ki ophisar na ki tnat trei -kam bapher bapher.
