Shillong, Naiwieng 29
Ka Meghalaya ka la mad ïa ka jingshah rem ha ka Maharashtra da 4 wiket ha ka lympung ïalehkai Vijay Hazare Trophy (men’s one day tournament) kaba la long ha ka Sngi Balang ha Jaipur.
Ha kane ka jingïakhun ka Meghalaya kaba la kam trai ban tied nyngkong, ka la ïoh 227 run bad shah pynkhyllem lut baroh ki nongtied ha ki 47.5 over. Ka Maharashtra kaba la wan shimti ïa pali ba ar, ka la shem jingeh ha kaba nyngkong naba ka la ïoh 60/4 hashwa ba kan kynjoh sha ka thong bad shah pynhap ar wiket bad ka dangsah ha kti sa 10 over.
Ha kane ka jingïakhun u Raj Biswa lem bad u Nakul Verma (guest player) ki la pyrshang ban ïalehkai bha ha kaba ki la lah ban ïatied lang 112 run na ka bynta ka wiket kaba nyngkong. Baroh ar ngut kine ki nongtied ki la lah ban khyrwit ïa ka shiteng spah run, u Biswa u la ïoh 56 run bad u Verma ula ïoh 55 run.
Kane ka long ka sien kaba lai ba u Biswa u la lah ban kamai ïa ka shiteng spah run bad kane ka jinglah ba tied ka la long ha ki 90 bol kynthup ia hynriew tylli ki ‘four’ bad kawei ka ‘six’. Na ka bynta u Verma, uba la ïalehkai bha ha kane ka lympung, u la khyrwit ïa hynriew tylli ki ‘four’ bad ka ‘six’ ha ki 75 bol.
Baroh ar ngut kine ki nongtied ki la shah pynkhyllem noh ha ki 30 over. Hadien kane la wan shimti da u Kishan Lyngdoh uba la tied 40 run na ka bynta ki 41 bol na ka bynta ka Meghalaya, katba Swarajeet Das (24) bad u Tanmay Mishra (23) ki la bynrap ha ka ban kamai run.
Hynrei hadien ym shym la don na ki nongtied kiba la lah ban kamai bun run ha kaba ka la pynlong ïa ka Meghalaya ban shah pynhap 7 wiket na ka bynta ki 21 run ha ki 6.3 over.
Watla katta ka Meghalaya ka la pyrshang ban ïalehkai bha ha ka ban kawang bol ha kaba ki saw ngut ki nongtied ba kynsai ka Maharashtra ki la shah pynhap wiket ha ki 13 over na ka bynta 60 run. U Siddharth Mhatre, u dei uba la ïalehkai ha ka sien kaba nyngkong ha ka one day jong ka BCCI bad u NS Naik, uba la ïalehkai kham hashwa ha ka Indian Premier League.
U Mhatre u la lah ban khyrwit 12 tylli ki ‘four’ na ka bynta ban kamai 87 run ha ki 74 bol, katba u Naik u la long u nongtied uba khlem shah pynkhyllem na ka bynta ban kamai 71 run na ki 82 bol. U Md Nafees u la lah ban pynurlong ïa ka Meghalaya ban khur 2/43 ha ki 10 over. U Sanvert Kurkalang u la lah ban pynhap wiket 2/48 ha ki 6.3 overs. U Das u la khur 1/37 ha ki 6.5 over.
Ka Meghalaya kan ïakhun biang ha ka sngi Thohdieng pyrshah ïa ka Services.
