Nongstoiñ, Naiwieng 29
Ka kynhun ïalehkai jong ka Mawkawah FC ka la ïoh ban khur ïa ka jingjop ha ka lympung ïalehkai NDSA Premier league Football Tournament 2023-24.
Kane ka jingjop jong ka Mawkawah ka la wan hadien ba ka la lah ban pynliem noh da 2-1 kol ïa ka Tiehrit FC ha ka jingïalehkai kaba la long ha ka sngi Balang ha madan NDSA kaba ha Nongpyndeng.
Shuh shuh ïa kitei kol jong ka Mawkawah la ïoh ban thep da u Rishanlang Nongsiej ha ka minit kaba 32 bad u Pynkhrawkupar Lyngkhoi ha ka minit kaba 36, katba ïa ka shi kol jong ka Tiehrit FC la ïoh ban thep da u Mark Anthony Thaba ha ka minit kaba 60.
Haba phai pat sha ka 1st Division, ka kynhun ïalehkai jong ka Siejlieh ka la ïoh ban khur ïa ka jingjop da kaba kala lah ban pynliem noh da 2-1 kol ïa ka Mawtynrong.
Na ka liang ka Football Committee, ka la pyntip ba ka jingïalehkai ha ka 30 tarik ha ka First Division kan long hapdeng ka Nongkhlaw SC pyrshah ïa ka Nongstoiñ FT ha ka por 12:05 mynsngi, katba ha ka Super Division kan long hapdeng ka Sawlad SC ïa ka Upper New Nongstoiñ ha ka por 2 baje janmiet.
