Princeton, Naiwieng:
Katkum ka jingwad bniah jong ka kynhun na United States, la ong ba bun hi na ki paid nongshong shnong ka Gaza ki la pyrshah ia ka jing-leh jong ki lehnoh Hamas haba iadei bad ka jingleit hiar thma ia ka Israel ha ka 7 tarik u Risaw, ha kaba katto katne ki paidbah ki la kwah ban lait noh na ka kti jingsynshar jong ka Hamas khnang ban lait ruh na ki jingma bad ki jingeh hadien-habud.
Kane ka kaiphod ka long hadien ba katei ka tnat ka la wad bniah bad peit thuh bha ia ka jinglong- jingman jong ki jingiakhih ki paidbah halor katei ka jingleit hiar thma ka kynhun lehnoh Hamas pyrshah ia ka Israel bad kumjuh ruh da kaba peit thuh ia ka jinglong- jingman jong ki paid nongshong shnong ha ka jingiadei kam jongki bad ki lehnoh Hamas kiba synshar ia ka Gaza baroh shi katta.
Katkum katei ka kaiphod, la shem ba ki don kumba 67% na ki paidbah nongshong shnong ka Palestine hapoh Gaza Strip kiba la pyrshah bad kwah ban lait noh na ka jingshah synshar ha ka kynhun lehnoh Hamas. Nalor kata la ong ba kane ka jingkheiñ ruh ka long naduh shuwa ba ki lehnoh Hamas kin leit hiar thma ia ka Israel.
Kumta, ha kane ka por lei ba ka Israel ka la leit ban hiar thma ia ka Gaza, ki paidbah ki la hap ban pdiang ba baroh ka dei hi ka jingbakla jong ka Hamas kaba leit ban sdang ia ka thma sha Israel. Namar kata, ki paidbah jong ka Gaza ha kane ka por ki la sheptieng ban shaniah biang ha ka Hamas bad ki la kwah ruh ban lait noh na ka kti jingsynshar jong ka Hamas hynrei ka jingeh kaba ki hap ban iaid lyngba haba iadei bad kane pat, ka long ka thma. Namar katba ka thma hapdeng ka Israel bad ki lehnoh Hamas kan dang bteng, ki paidbah ruh kin dang hap ban shah ia ki jingeh kiba pher naduh ka jingkyrduh bam, ka um, ka bor ding ilektrik bad kiwei- kiwei kiba ka Gaza ka ju ioh jingkyrshan na ka Israel baroh shi katta.
Ka Jamal kalong kawei na ki nongwad bniah ba shadien jong ka Arab Barometer kaba ju leit wad bniah bha ha katei ka thaiñ jong ka ri Palestine.
Kumta, ka Jamal ka la iathuh ba ka Hamas, kaba la jop ia ka jingiakhun ilekshon ha u snem 2006 hapoh Gaza, ka dei ruh ka kynhun kaba la shah ñiew kynhun lehnoh ha ka United States bad kumjuh ruh ha ka European Union. Kumta ruh kiba bun ki kam kiba katei ka kynhun ka leh, ki long kiba be-aiñ bad kam don jingmih ne jingsoi naka bynta ka bha- ka miat bad ka ioh- ka kot jong ka Gaza wat naduh kine ki snem kiba la leit.
Kumba 75% na ki paidbah ka Gaza ki la iathuh ba kim shym lah wat tang ban pynbiang ia ka bam- ka dih ha iing- ha sem ha kine ki 30 sngi ba la leit. Kumta, la sngewthuh shai ba ka jingsynshar jong ka kynhun lehnoh Hamas hapoh Gaza ka long ka ban iap bad ka ban pyniap duh ia ki paidbah namar ki jingeh- jing jynjar ba ki hap ban mad bad ki hap ban shah katba ki dang hap hapoh ka kti jingsynshar jong ki lehnoh Hamas.
