Pyongyang, Naiwieng:
Ka North Korea ha kine ki khyndiat sngi ka la pyntip ba u Satellite uba ka dang shu dep leit buh shen ha kane ka taïew ba la lah, u dei uba lah ban iohi ia ka iing White House jong ka United States, ka Pentagon bad ia kiwei de ki jaka treikam ka United States. Namar kumba la tip, ka North Korea ka la leit buh ia utei u ‘Spy Satellite’ na ka bynta ban ioh peit syntiat ia ki jinglong- jingman ha kylleng sawdong jong ka.
Kumta, la ong ba ka North Korea ka la kam ba ka la ioh ban ring dur bha ia baroh ki jaka bad ki bynta kat kiba ka kwah ban peit da ka jing-iarap jong utei u kor Satellite ba ka la wan buh ha ka taiew ba la lah.
Haba iadei bad kane, ka South Korea ha ka taiew ba la lah, ka la maham pyrshah ia ka North Korea naduh shuwa ba kan leit buh ia utei u satellite namar la ong ba kan long pat ka jingma ia ki ri ba marjan lada ka North Korea kan iohi bad peit thuh ia ki jinglong-jingman bad jingleh-jingkam jong kitei kiwei pat ki ri hynrei ka North Korea khlem da pynsngap ia ki jingmaham jong ka South Korea nalor jong ka United States kaba la maham ba ka North Korea ka la pynkheiñ ia ki kyndon haw-haw da kaba leh ia katei ka kam, kumta ruh la ong ba ka North Korea ha kane ka taiew ba la leit, ka la ioh ban leit buh ia utei u ‘Spy Satellite’ ha ka sien kaba lai (3) hadien ba ka jingpyrshang jongka ha ki 2 sien ka la pulom noh. Ka North Korea ka la ong ruh ba ka jinglah ban leit buh ia utei u kor satellite ha kane ka por, ka long ka jingjop kaba khraw ia ka namar ba ka la pyrshang haduh 3 sien ban leh ia kane ka kam bad ha kane ka sien kaba lai, ka jing-angnud bad jing-thrang jongka, ka la urlong lut.
Watla katta, ka North Korea ka la pyntip ba utei u satellite ba thymmai jongka, um pat treikam bha hynrei un sa sdang ban treikam pura naduh ka 1 tarik jong une u Nohprah u ban wan.
Haba iadei bad kane ka khubor, ym pat don kiwei pat ki ri ne ki tnat jong ka pyrthei ki ban pyntikna halor katei ka kam. Hynrei dei tang ka North Korea hi kaba la pyllait ia ki dur kiba ka kam, ba ki long kiba la ioh shon bad ioh ring na utei u satellite uba ka dang shu dep leit buh shen.
Shuh shuh la ong ba ka North Korea ha kine ki sngi, ka la kylla long ka ri ka ban thaw rekod thymmai haba iadei bad ka jingleit buh satellite bad kine baroh ki la urlong hapoh ka jingialam jong u nongialam ba ha khlieh duh jong ka North Korea, u Kim Jong Un.
