Amlarem, Naiwieng 29
Ka Seinbhalang Skhentalang ka la pynliem noh ïa ka YSWC Thangbuli da 3-0 kol ha ka lympung ïalehkai Super Division Football League ba la pynïaid da ka Amlarem Sub Division Sports Association (ASSA) ha ka sngi Balang ha madan Mini Stadium Ladjaplem, Amlarem.
Ha kane ka jingïakhun ka Seinbha-lang Shkentalang ka la pyrshang ban ïakhun tyngeh naduh kaba sdang ha kaba u Ruben Dkhar u la ïoh ban pynkhih jar ha ka minit kaba 14. Hadien shiteng kynta kane ka kynhun ka la pynbud ïa ka kol ba ar lyngba u Isak Surong ha ka minit kaba 35 na ka bynta ban tam ar kol ha ka kylla step.
Hadien katto katne ba la bteng ïa ka jingïakhun jong ka kylla miet ka Seinbhalang Shkentalang ka la thep biang ïa ka kol kaba lai lyngba u William Suting ha ka minit kaba 79 na ka bynta ban khur syndon ïa ka jingjop.
Kane ka lympung kan bteng biang ha ka 30 tarik ha kaba ka Amlarem Social Club kan ïakhun pyrshah ïa ka Man I Bha SC ha ka por 2 baje janmiet.
