Shillong, Naiwieng 29
Ka rynsan ïakura jong ka 7th Elite Men’s National Boxing Champion-ship ka la jam sha semi final hadien ba la lah ban pyndep ïa ki jing-iakhun jong ka quarter final ha ka Sngi Balang ha SAI Indoor Hall, NEHU.
Ha kane ka sngi, u Myntri Rangbah ka Jylla u Conrad K. Sangma u la wan ban sakhi da lade ïa kane ka lympung ïakura ha kaba u la ïoh ban ïakren ruh bad ki rangïalehkai.
Ha kane ka jingïakhun quarter final, u khur ïakura uba long u lahduh ha ka Asian Games 2018 u Amit Panghal na ka Services u la khur ïa ka jingjop ha ka flyweight 48-51kg hadien ba u la lah ban pynliem noh ïa u Md Aarif uba na Jammu and Kashmir. Kane ka jingjop ka la long kumjuh ruh ïa u rangïakura na Assam u Shiva Thapa, ha kaba une u khlur ïakura uba la khur takma hynriew sien ha ka Asian Championships, u la jam sha ka semi final ha ka light welterweight 60-63.5kg hadien ka jingjop ïa u Shashank Pradhan na Delhi.
U lahduh ha ka Asian Champion 2021 u Sanjeet jong ka Services u la khur jingjop ha ka quarter final pyrshah ïa u Naman Tanwar na Railways ha ka kyrdan ïalehkai heavyweight 86-92kg.
Kumjuh ruh u Sagar, uba la khur ïa ka takma rupa ha ka CWG 2022, jong ka Railways u la khur jingjop pyrshah ïa u Navjot Singh na ka Chandigarh ha ka super heavyweight 92kg. Ha kane ka jingïakhun na ka liang u rephri u la hap ban pynsangeh tang ha ka wat kaba nyngkong hadien ba u Sagar ula kura da kaba tyngeh ïa u rangïakura ka liang pyrshah.
Lah ban kdew ba ha kane ka lympung ki la don haduh 104 ngut ki rangïakura kiba la wan kylleng jong ka ri ban ïashim bynta ha ki 13 tylli ki kyrdan ialehkai haduh ba la lah ban pyndep ïa ka quarter final hynne ka sngi.
Kane ka lympung ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka jingïatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla.
