New Orleans, Naiwieng:
Ha kane ka khubor la ong ba uwei u briew uba shong ha ka liengsuiñ jong ka Southwest Airlines Flight (SAF) u la shah kem noh ha ka Sngi U Blei hapoh New Orleans ha United States hadien ba u la kynthih shabar ka liengsuiñ na ka jaka mih ba kyrkieh bad leit ban kiew pat sha ki thapniang jong katei ka liengsuiñ, da kaba pyrshang ruh ban phet krad na katei ka jaka katba katei ka liengsuiñ ka dang pynkhreh ban her noh. Ka Jefferson Parish Sheriff’s Office (JPSO) ka la iathuh ba utei u briew bym shym la pynpaw kyrteng, u dei uba la don ha ki rta ba 38 snem bad la kem noh ia u ha ka por ba u la dep ban kiew sha ka thapniang jong katei ka liengsuiñ bad pyrshang ban phet na katei ka Kad Liengsuiñ ha katei ka sngi.
La ong ba katei ka jingjia ka long hashwa ki khyndiat por ba katei ka liengsuiñ ka la dei ban her bad mih noh na katei ka Kad Liengsuiñ.
Katkum ka jingiathuh jong ki nong sakhi kiba don ha katei ka liengsuiñ ha ka por ba katei ka jingjia ka la jia, la ong ba utei u rangbah u la pyrshang ban phet napoh ka liengsuiñ da kaba iaid lyngba ka thapniang jong katei ka liengsuiñ bad pyrshang pat ban phet krad na katei ka Kad Liengsuiñ ban kiar na ki bor pyniaid.
Haba la bat noh ia u da ki pulit, utei u briew um shym i-peit mat ne tip briew bad kumta la rah noh ia u sha ka jaka sumar kaba don ha katei hi ka nongbah naka bynta ki jingpeit bniah namar kumba la shu suba, utei u briew u lah ban dei uba don jingduna ha ka bor pyrkhat bad u bym biang khlieh.
Kumjuh ruh la ong ba ym shym la ioh jingtip eiei ba utei u briew un ieh noh ia ki tiar jong u ha katei ka liengsuiñ hynrei ym shym la don eiei hi ruh ha ka met jong u ha katei ka sngi bad ym don dak sniew eiei ban shem na utei u briew la ka long ia kino- kino ki tiar kum ka suloi, ki drok ne kiei kiei ruh.
