Shillong, Naiwieng 29
Ka Laitlyngkot SC ka la pynliem noh ïa ka Sohïong SC da 2-0 kol na ka bynta ban khur ïa ka jingjop ha ka lympung ïalehkai Second Division Football League 2023 ba la pynïaid da ka Shillong Sports Association ha ka Sngi Balang ha SSA Stadium, Polo.
Kane ka nam jop ka la wan urlong lyngba u Libesstar Nongkyn-rih na ka bynta ban pynlong ïa ka Laitlyngkot ban khur ïa ka jingjop.
Ha kane ka jingïakhun ka Laitlyngkot ka la pyrshang ban ïakhun tyngeh naduh kaba sdang ha kaba ka la ïoh ban pynkhih jar nyngkong eh lyngba u Libesstar ha ka minit kaba 10. Une u rangïalehkai shakhmat u la pynbud biang ïa ka kol kaba ar ha ka minit kaba 61 jong ka kylla miet na ka bynta ban khur syndon ïa ka jingjop.
Haba phai sha kawei pat ka jingïakhun hapdeng ka Mawtawar SC bad ka Jongksha SC ki la ïasam mar shi point hadien ba ki la ïakhaid mar 2-2 kol.
Wat la kine ki kynhun kim shym la lah ban thep kol ha ka kylla step, hynrei dei ha ka kylla miet ba ka Jongksha ka la ïoh ban thep ar kol lyngba u Jopborlang Khongsngi ha ka minit kaba 56 bad ïa kawei pat lyngba u Babiang Umsong ha ka minit kaba 65.
Hadien saw minit ka Mawtawar ka la lah ban pynphai kylla lyngba u Fedrick Lyngdoh bad hashwa ban wai ka la thep biang ïa ka kol kaba ar lyngba u Ronaldo Rangslang ha ka minit kaba 80 na ka bynta ban ïakhaid mar ar kol.
Ka jingïalehkai ha ka Sngi Palei kan long hapdeng ka Umphrup SC pyrshah ïa ka Imson SC ha ka por 11:30 mynstep, katba ka Nongrah SC ïa ka Lumshyiap SC ha ka por 2:30 janmiet.
