Nongstoiñ, Naiwieng 30
Ka kynhun ïalehkai jong ka Pyndengrei SCSC ka dang ïai bat ïa ka kyrdan kaba hakhlieh duh ha ka miej ïakheiñ point jong ka Super Division na ka bynta ka NDSA Premier League Football Tournament 2023-24.
Kane ka kynhun ka la kamai 7 point, ka Mawkawah FC ka la wan ha ka kyrdan kaba ar, ka Khlieh-mawlieh YC ha ka kyrdan kaba lai na ki lai sien ïakhun.
Haba phai pat ha ka jingïalehkai ha ka Super Division kaba la long ha ka sngi Palei, ka kynhun ïalehkai jong ka Upper New Nongstoiñ ka la ïoh ban khur ïa ka jingjop hadien ba ka la lah ban pynliem noh ïa ka Sawlad SC da 2-0 kol ha ka jingïalehkai kaba la long ha madan NDSA kaba ha Nongpyndeng.
Shuh shuh ka jingjop jong ka Upper New Nongstoiñ ka la wan ruh lyngba ki kol ba la ïoh ban thep da u Arkin L. Kynshi ha ka minit kaba 21 bad u Shaining Marweiñ ha ka minit kaba 44.
Haba phai sha ka First Division, ka kynhun ïaleh -kai jong ka Nongstoiñ FT ka la ïoh ban khur ïa ka jingjop hadien ba ka la pynliem da 2-1 kol ïa ka Nongkhlaw.
Na ka liang ka Foot-ball Committee ka la pyntip ruh ba ka jingïalehkai ha ka sngi Thohdieng ha ka First Division kan long hapdeng ka Nongkynjang SC pyrshah ïa ka Mawkhlam SC ha ka por 12:05 mynsngi, katba ha ka Super Division ka Nongpyndeng SS&CC kan ïakhun pyrshah ïa ka Pyndengrei SCSC ha ka por 2 baje janmiet.
