Jaipur, Naiwieng:
U nongïalam jong ka seng BJP u Rajendra Singh Rathore u la pynpaw ka jingkyrmen ba ka seng Bharatiya Janata Party kan sa jop ha ki 135 tylli ki konstitwensi ha ka ilekshon ha Rajasthan bad ba kan sa ïohmad ïa ka jingjop donburom ha ka jylla.
U Rathore, uba la long u nongïalam jong ka liang pyrshah ha ka Assembly ka ban sa kut noh, u la kynthoh jur ïa ka seng Congress halor ka jingkren jong u Myntri Rangbah jong ka jylla u Ashok Gehlot ha kaba u la ong ba ka la don ka jingbteng jong ka jingsynshar katkum ka jingkwah jong ka seng Congress.
“Ka jingkren jong u Gehlot ka long kaba shisha haba u ong ba kan don ka jingbteng ka jingsynshar. Kane kaba u kren kan sa pynkyndit bad pynlyngngoh ïa ka seng Congress,” la ong u nongïalam jong ka seng BJP.
U la ong ba ki briew kim sngew shaniah halor ki jingkular ba la ai da ka sorkar Congress bad ki la ïaleh ban kyndang noh ïa kane ka seng na ka bor synshar ha ka jylla.
Ïa ka jingthep vote la pynlong ha Rajasthan ha ka sngi Saitjaiñ ha kaba ki la don kumba 74 per cent ki nongthep Vote kiba la leit ban ïashim bynta ban pyndep ïa ka hok jong ki. Ïa ka ilekshon la pynlong ha ki 199 tylli na ki 200 tylli ki konstitwensi ha ka jylla naba ïa ka ilekshon ha kawei pat ka konstitwensi la pynsangeh shwa namar ka jingkhlad noh jong u kyrtong jong ka.
Ka jingñiew ïa ki vote ha Rajasthan, ha ryngkat saw tylli kiwei pat ki jylla kan sa long ha ka 3 tarik, Nohprah.
