Nongpoh, Naiwieng 30
Ka Shillong Lajong FC ka la jam sha ka quarter final ha ka lympung ïalehkai kynjatbol kaba la ai nam kyrpang ïa u Bah E.K Mawlong (bam kwai ha dwar U Blei) kaba la tip kum ka E.K Mawlong Memorial Trophy. Kane ka wan hadien ba pynliem ïa ka GFC Border Bhutan da 2-0 kol ha ka Sngi Palei.
Ïa kane ka jingïalehkai la pynlong ha ka madan ïalehkai jong ka Mawlasnai kaba la pynïaid ruh da ka Mawlasnai Sports Club kum shi bynta ban pynsah nam bad kynmaw kyrpang ïa u synñiang u bynhei bad ki jingshakri jong utei u nongïalam ba radbah ka Jylla sha ka imlang ka shalang, uba la long ruh kum u MDC, MLA ka thaiñ bad kiew ruh shaduh ka kyrdan Myntri Rangbah jong ka Jylla.
Haba phai khyndiat sha ka jingïakhun ha katei ka sngi, kaba dei ruh ka Pre-Quarter kaba lai, ka jingïakhun hapdeng ki rangïalehkai ka Shillong Lajong FC pyrshah ïa ka GFC Border Bhutan ka la long shisha kaba itynnad bad pynshongshit shi kat dei ïa ki paidbah naba baroh ar kynhun ki la sei ïa la ki sap ki phong ban rah ïa ka jingjop.
Hynrei ka jingtbit bad ka jinglah jong ki rangïalehkai ka Shillong Lajong ka la pynlong ïa ki ban pynliem noh da 2-0 kol pyrshah ïa ka GFC Border Bhutan hapoh ka 90 minit jong ka jingïakhun. U Sam Chaphrang jong ka Shillong Lajong FC u la ïoh ban khur ïa ka khusnam Man of the Match.
Kum ban shu pyntip khyndiat, ka kynhun ka ban rah ïa ka nam lahduh ha kane ka pympung, kan ïoh ban rah ïa ka song pisa kaba T. 2 lak ryngkat ka trophy, katba ka wan ba-ar pat kan ïoh ban rah ïa ka song pisa kaba T. 1 lak ryngkat ka trophy.
