Khliehriat, Naiwieng 30
Ka Dhana SC bad ka Sutnga SSCC ki la long ar tylli ki kynhun kiba la bteng ban khur jingjop ha ka Super Division Football Tournament kaba pynïaid da ka East Jaiñtia Hills District Sports Association (EJHDFA) kaba long ha Diengshynrum.
Ha kane ka jingïalehkai, ka Dhana ka la pynliem noh da 3-0 kol ïa ka Rymbai Ïawpynsing. Ïa kine ki lai kol la thep lyngba u Harita Suchen ha ka minit kaba 10, kumjuh u Pynioo Dkhar ha ka minit kaba 45 bad ïa kawei pat la thep da u Yeslang Lamo ha ka minit ba 69.
Haba phai sha kawei pat ka jingïakhun, ka Sutnga SSCC ka la pynliem noh ïa ka Thangskai Tigher da 2-1 kol. Ïa kine ki ar kol la thep da u Neesta Feeco Bamon ha ka minit kaba 14′ bad ïa kawei pat la thep da u Onio Sutnga (39′). Katba ïa ka shi kol na ka Thangskai la thep da u Sooki Syrti (89).
Haba phai sha ka 1st Open Veteran Football Tournament ka la jam sha ka semi final ka ban long ha ka 5 tarik u Nohprah.
Ka semi final kaba nyngkong kan long hapdeng ka West Jaiñtia Police pyrshah ïa ka 12 Dolloi FT ha ka por 11 baje mynstep, katba ka semi final kaba ar kan long hapdeng ka Ar Dolloi SC pyrshah ïa ka Tyllilang VFT ha ka por 1:30 nohphai sngi.
