New Delhi, Naiwieng:
Ka Central Bureau of Investigation (CBI) ka la kem ïa u Principal General Manager bad u SDE kiba dei baroh arngut ki nongtrei ka Bharat Sanchar Nigam Limited (BSNL) kaba ha Bhopal jong ka Madhya Pradesh. Kane ka long halor ka jingshah kynnoh ba ki la donkti ha ka jingklop tyngka, la ïathuh ki heh jong ka kynhun tohkit ha ka sngi Ba-ar.
Ïa ka mukotduma la buh ha kaba ïadei bad ka jingdon ka jingmudui pyrshah ïa u Rakesh Yadav, uba dei u SDE bad u Mahendra Singh uba long u Principal General Manager, halor ka jingkynnoh ba kine baroh arngut ki la dawa ïa ka pisa na u nongmudui, la ïathuh ka kynhun CBI.
Kumba la pynshisha, la ong ba ka jingmudui mukotduma na ka bynta ban pynshitom ïa ki la phah sha u nongmudui da u PGM bad ka jingkhmih bniah bad ka jingbishar ha kaba ïadei bad kane ka jingjia ka dang sahteng.
Shuh shuh la pynshisha ba u SDE u la dawa ïa ka pisa kaba T. 40 hajar na u nongmudui bad pyntip sha u ba u PGM jong ka BSNL u la dawa ïa ka pisa na ka bynta ka jingïasngewthuh jingmut ha kaba ïadei bad ka rai halor ka jingmudui kaba dang sahteng katkum ka jingkwah jong u, la pynshisha ka kynhun CBI ha ka jingthoh ba ka la phah.
Shuh shuh la pynshisha ba u SDE u la ong ruh ïa u nongmudui ba lada um siew ïa kane ka pisa ba la dawa, kata u PGM un sa leh ïa kaba donkam ban pynshitom ïa u.
U SDE kumba la pynshisha, la ong ba u la phah jingtip sha u nongmudui ba u PGM u la bthah ïa u ba un siew shwa ïa ka pisa kaba T. 15,000 na kaba la dawa T. 40,000 bad kaba dang sah la hap ban siew pat, la ong ka jingthoh ba la wan na ka kynhun CBI.
Ka kynhun CBI ka la pynlong ïa ka jingpynap shrip ha kaba ki la lap ïa u PGM katba u dang kner ban shim ïa ka pisa ba u la dawa ba la dei ban siew shwa kaba long T. 15,000 na une u nongmudui.
Ki la don ki jingleit khynra ha ki jaka sah bad ki jaka treikam jong u PGM ha Bhopal ha kaba da kane ka jingpyntreikam, la ïoh ban kurup ïa ka pisa kaba T. 8 lak, 240.5 g ka ksiar bad 1915 g ka rupa, bad kiwei pat ki jingdon jingem kiba long beaiñ, la bynrap ka jingthoh.
Hadien kane, u SDE ruh u la shahkem lang. Ha ka por ba la pynlong ïa ka jingleit khynra ha ka jaka sah jong u SDE, la lap ïa ki jingthoh kiba long beaiñ bad kumjuh u shabi jong ka Locker na u, la ong shuh shuh ka jingthoh.
