Moscow, Naiwieng:
Katkum ki khubor la ong ba ka Russia ka la kem noh ia uwei u briew bad set patok haduh 10 sngi kynthih tang namar ka jingpyrshah ia ka jingleit hiar thma jong ka Russia pyrshah ia ka Ukraine bad ia kane u la pynpaw da kaba thoh ia ki kyntien “No to War” ha ki jaka ba sop thah hapoh ka nongbah Moscow.
Kumta, la ong ba ka Russia haduh mynta- mynne ruh kam ju ailad ia kito kiba pyrshah ia ka jingleit hiar thma jong ka sha Ukraine kaba la sdang naduh u Rymphang 2022. La don ruh da ki hajar ngut kiba la shah bat ne shah kem ha ka Russia namar ka jingpyrshah.
Katkum ki jingthoh ba la pynshai da ka ïingbishar jong ka Russia ha ka 24 tarik mynta u Naiwieng, la ong ba utei u briew uba la ithuh kum u Dmitry Fedorov u la shah bat noh ha ki pulit ha ka Sngi Palei jong ka taïew ba la dep hapoh ka Gorky Park namar ka jingthoh jong u ha kitei ki jaka ba sop thah ban kren pyrshah ia ki kam bad jingleh jong ka sorkar Russia. Namar katkum ki aiñ jong ka ri, utei u briew u la pynkheiñ ia ki kyndon aiñ da kaba pyrshah ia ki rai jong ka sorkar.
