Israel, Naiwieng:
Katkum ka khubor ba la ioh lum na kito kiba shah rahbor ha ki lehnoh Hamas, la ong ba kitei kiba shah rahbor baroh ki la shu shah set bad shah thngan baroh shi katta ki sngi ba la shah rahbor ha ki lehnoh Hamas.
Ki lehnoh Hamas ki la pyllait noh ia kumba 50 ngut ki nong Israel kiba kynthup ia ki longkmie, ki kynthei bad ki khyllung- khynnah hadien ka jing iamynjur jong ka Israel bad ka Hamas ban sangeh thma kumba 4 sngi naka bynta ban ioh pyllait ia kitei kiba shah rahbor bad ha kajuh ruh ka por ban ioh pynpoi ia ki lad jingiarap na ki ri bad ki tnat bapher jong ka pyrthei sha ki paid nongshong shnong jong ka Gaza. Napdeng kitei ki nong Israel, ki don sa 17 ngut kiba dei ki nong Thailand bad katto- katne ngut pat na kiwei ki ri.
Hynrei ki dang don sa kumba 100 tam ki nong Israel kiba la shah rahbor ha ki Hamas bad kiba dang don ha ka kti ki lehnoh Hamas tad haduh kane ka kynti.
U Ronit Zaidenstein, u heh jong ka Shamir Medical Center uba dei peit bad sumar ia ki 17 ngut ki nong Thailand kiba la shah pyllait noh ha ka Hamas, u la iathuh ba kitei ki 17 ngut kiba shah rahbor ki la don jingshitom ha ka met namar ki la shah bsa da ki jingbam ki bym tei ne pynkhlaiñ ia ka bor met jongki naduh ka por ba ki shah rah ha ki lehnoh Hamas sha Gaza.
Kumjuh ruh la ong ba kitei kiba wan phai baroh kiba la shah pyllait noh ha ka Hamas, ki la hiar haduh kumba 10% ka jingkhia na ka met jongki namar ka jing bym biang jong ka bam bad ka jinglong- jingman ha ki liang baroh ha ka por ba ki shah set ha Gaza.
Nalor kata, la ong ba ki lehnoh Hamas kiba dei khmih ia ka jaka ba la set ia ki, kim shym la ai wat tang ka jingshai ha ka jaka ba ki shong bad ki la pynmeh lait (light) ne plied ia ki ingkah tang kumba 2 kynta eiei.
Haba iadei bad ka jingpyllait ia ki paidbah ba shah rahbor ha kane ka por, kiba bun ki ri ki la kyntu ia ka Israel ba kan sangeh noh shwa ia ka thma katba ka Hamas kam pat pyllait lut ia kito kiba ka la rahbor baroh, khnang ba ka jingma jong ka thma kan lait ruh ban ktah ia kitei ki paidbah kiba don ha Gaza.
