Shillong, Naiwieng 30
Ka lympung ïalehkai Second Division Football League 2023 ba la pynïaid da ka Shillong Sports Associa-tion ka la nangjam shaphrang ha kaba ka Umphrup SC bad ka Nongrah SC ki la khur ïa ka jingjop ha ka sngi Palei.
Ha kane ka jingïakhun kaba la long ha SSA Stadium Polo, ka Umphrup SC ka la pynliem noh ïa ka Imson FC da 5-1 kol bad u Bannongkiew Khriem u la ïoh ban thep ar kol.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang. Ha kum kane ka jingïakhun, ka Umphrup ka la ïoh ban pynkhihjar nyngkong eh lyngba u Freddy Kharbyngar ha ka minit kaba 25. Kane ka kynhun ka la pynbud biang ïa ka kol kaba ar hadien shiteng kynta lyngba u Shanme Warlarpih (31) na ka bynta ban tam 2-0 kol.
Ha kajuh ka minit kaba 43 kine ki kynhun ki la ïathep mar shi kol ha kaba na ka Umphrup la thep da u Bannongkiew Khriem, katba na ka Imson la thep da u Micheal Kshiar.
Hashwa ban kut ka jingïalehkai jong ka kylla step ka Umphrup ka la thep biang ïa ka kol kaba saw lyngba u Nangpynkhraw Kshiar ha ka minit kaba 45 na ka bynta ban tam da 4-1 kol.
Hadien ba la bteng biang ïa ka jingïakhun jong ka kylla miet, u Bannongkiew u la ïoh ban thep biang ïa ka kol kaba ar ka jong u ha ka minit kaba 68 na ka bynta ban pynlong syndon ïa ka Umphrup ban khur ïa ka jingjop.
Haba phai sha kawei pat ka jingïakhun kaba ar, ka Nongrah ka la jop da 3-0 kol ïa ka Lumshyiap SC. U Dawandappura Pathaw u la thep ar kol ha ka minit kaba 46 & 79, katba ïa kawei pat la thep da u Shanbok Marboh ha ka minit kaba 50.
Ka jingïalehkai ha ka sngi Thohdieng kan long hapdeng ka Pohkseh SC pyrshah ïa ka Laitkyrhong SC ha ka por 11:30 mynstep, katba ka Sohryngkham SC ïa ka Marbisu SC ha ka por 2:30 janmiet.
