Shillong, Naiwieng 30
Ka lympung ïakura jong ka 7th Elite Men’s National Boxing Championship ka la jan poi artad sha kaba kut, ha kaba 26 ngut ki rangïakura ki la jam sha ka final bad ban ïaknieh ïa ka nam lahduh ha ka Sngi Thohdieng ha SAI Indoor Hall kaba ha NEHU.
Ha kine ki hynriew sngi ki la don haduh 400 tylli ki ’bout’ kiba la lah ban pyndep ïa ki jingïakhun kiba don haduh 13 tylli ki kyrdan ïalehkai. Hynne ka sngi la lah ban pyndep ïa baroh ki jingïakhun semi final. Te kumta ki rangïakura ki la khmih lynti ban pynurlong na ka bynta ban khur ïa ki takma ksiar bad ruh ban pynkhreh na ka bynta ki lympung ïaknieh rung sha ka Olympic.
Ha kine ki jingïakhun semi final, u rangiakura ka Services u Amit Panghal, uba la khur ïa ka takma rupa ha ka World Championships 2019, u la lah ban pynliem noh ïa u rangïakura ka Railways u Ankit ha ka flyweight 48-51kg. Ha kum kane ka jingïakhun na ka liang ki nongbishar ki la rai jop ïa u da 5-2.
Kumjuh ruh kam shym la don jingeh ïa u khlur ïakura ka Assam u Shiva Thapa, uba la khur takma teng haduh hynriew sien ha ka Asian Championships, na ka bynta ban khur jingjop ha ka light welterweight 60-63.5kg da 5-0 pyrshah ïa u Harivansh Tawari jong ka Maharashtra.
U Harsh Choudhary na Rajasthan u la lah ban jam sha ka final ha ka kyrdan ïakura jong ka light heavyweight 75-80kg, hadien ba u la lah ban pynliem ia u rangïakura na Delhi u Harsh Lakra.
Ha ka kyrdan ïakura jong ki heavyweight 86-92kg bad super heavyweight 92kg-plus, u San-jeet jong ka Services, uba long u lahduh ha ka Asian Championship 2021, u la khur jingjop lyngba ka jingïarai lang da baroh ki nongbishar pyrshah ïa u Vicky jong ka All India Police.
U rangïakura ka Railways u Sagar, uba la khur ïa ka takma rupa ha ka Commonwealth Games 2022 u la jop da 5-0 ïa u Vishal Kumar uba na Delhi.
Ïa kane ka lympung ïakura la pynlong da ka Meghalaya Boxing Asso-ciation ha ryngkat ka jingïatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla. Ïa kane ka jingïakhun final yn pyni paidbah lyngba ka Doo-rdarshan bad kumjuh ha ka YouTube channel jong ka BFI.
