New York, Naiwieng:
Uwei u khynnah pule na India uba dang 23 snem ka rta, u la shah kem bad shah pynngat kyndon noh ha ki pulit ka United States hadien ka jingdon kti jong u ban pyniap ia ki kmie ieid-kpa ieid tymmen bad ia u kñi hapoh ka New Jersey.
Ia utei u khynnah la ithuh kyrteng u Om Brahmbhatt bad ki pulit ki la pharep ia u halor ka jingshah siat iap ki kmie-ieid kpa-ieid, kata u Dilipkumar Brahmbhatt (72 snem), Bindu Brahmbhatt (72 snem) bad u Yashkumar Brahmbhatt (38 snem) kum kñi ha ka Sngi Nyngkong.
Namar la ong ba tang mar ia ioh jingtip halor ka jingïap jong kitei 3 ngut ha katei ka iingsah jong ki, ki heh pulit ki la leit mareh wut-wut bad shem ia kitei 2 ngut ki rangbah bad katei ka tymmen kiba la thiah iap ha madan ha ryngkat ki dak mong kuli na ka met.
Ia kitei ki kmie-ieid bad kpa-ieid jong u, la shem na ka mala ba ar ha ryngkat ia utei u khun jong ki uba long u kñi jong utei u khynnah pule. Hadien kata la pynkit noh ia utei u kñi sha ka jaka sumar kaba kham hajan hynrei u la khlad noh tang hadien katto-katne kynta namar ka jingjur palat ki jingmynsaw.
Naduh katei ka sngi hi ki pulit ki la bat noh ia utei u khynnah pule uba long u suba don kti ha katei ka kam pyniap. Hadien nangta pat la shem ba dei ma u uba siat iap ia kitei ki dkhot jong katei ka iing bad kumta ki pulit bad ki bor ka aiñ jong ka New Jersey ki la pynngat noh ia utei u khynnah pule hapoh ki kyndon pynkheiñ aiñ haba ia dei bad katei ka jingjia.
Shuh shuh ruh la ong ba u Om u dei na Gujarat bad u dang shu leit sah shen sha New Jersey dang ha kine ki khyndiat bnai mynta.
Ia mynta, ki pulit ki la aiti noh ia u ha ka tnat Middlesex County Adult Correctional Center ban pynshai ia ki kyndon kiba lah ban pynngat halor jong u namar katei ka kam pyniap briew kaba u la don kti.
Ki pulit ki la iathuh ruh ba u Om, u la phla ba u la pyndonkam da ka suloi rit kaba u shu thied ‘Online’ bad kaba sngew lyngngoh ka long ba dei ma u hi uba pyntip sha ki pulit ha ka step Sngi Ba-ar lyngba u nombar 911 jong ki pulit katei ka ri bad haba la kylli ia u ba dei mano kiba don kti ha katei ka kam, u Om u la jubab ba lehse u dei ma u ruh.
Hynrei ia ka daw jong katei ka jingjia ym pat lah satia ban pynshai namar ka jingtohkit ka dang iaid sha khmat bad kumta ia ki jingtip kiba bniah yn sa lah ban pynshai hadien ynda la pyndep lut ia ki jingtohkit bad ki jingbishar.
