Imphal, Naiwieng:
U lehnoh jong ka kynhun kieng atiar ka Kanglei Yawol Kanna Lup (KYKL) Meitei ba la tip kyrteng kum u SS Uttam Moirangthem, u la shah pynïap ha ka por ba don ka jingïasiat kaba markylliang hapdeng ki dkhot ka kynhun People’s Defence Force (PDF) bad ki dkhot jong ka Myanmar Military ha Myanmar.
Kumba la ïathuh ka tyllong khubor, la ong ba ïa kane ka jingjia kaba la jia la lah ba sakhi ha kaba la ong ba ka la dei na ka daw jong ka jingmih ka jingïasiat hapdeng ki dkhot jong ka PDF bad ki dkhot jong ka Myanmar Military ha ryngkat ka jingkyrshan jong ki lehnoh Meitei.
Kumba la pynshisha, la ong ba u Moirangthem u la donkti ha ka kam hiar thma kaba la jia ha u snem 2015 pyrshah ïa ka kynhun jong ki shipai jong ka kynhun 6 Dogra Regiment ha Manipur, ha kaba kane ka la pynïap ïa 18 ngut ki shipai bad pynmynsaw ïa 11 ngut kiwei pat. Ka jingjia shah thombor kaba la jia ha u 2015 ka dei ka jingjia kaba shyrkhei bad ka jingduhnong na ka bynta ka kynhun shipai jong ka tnat Indian Army ha Northeast, kaba la jia ha Chandel distrik jong ka Manipur, hajan khappud Myanmar.
