Jowai, Naiwieng 30
Ka lympung ïalehkai Super Division Football Tournament ba la pynïaid da ka West Jaiñtia District Sports Association (WJDSA) ka la jam sha ka semi final kaba la buh sngi ban pynlong ha ka 4 tarik u Nohprah.
Ha ka jingïakhun kaba khatduh kaba long ha Kiang Nangbah Stadium ha ka sngi Palei, ka Ladthadlboh ka la lah ban pynliem noh ïa ka Shang -pung Lumiawmushai da 5-0 kol.
U Banteilang Shylla u la khur ïa ka hat-trick hadien ba u la ïoh ban thep marwei haduh saw kol ha ka minit kaba 56′, 70′, 72′ & 90’+3, katba ïa ka shi kol la ïoh ban thep kham hashwa da u Daunisakhiat Dkhar ha ka minit kaba 8′.
Da kane ka nam jop ka Ladthadlaboh ka la wan ha ka kyrdan kaba hakhlieh duh jong ka miej ïakheiñ point bad la bud sa ka Sailung Ïalong, Niawa Wasa bad ka Nangbah Mulang. Katba ka Khimusniang bad ka Mynthong ki la hap ban hiar noh sha ka kyrdan First Division.
Ka Demthring kaba la bat ïa ka nam lahduh ha ka First Division bad ka Wahïajer kaba la wan ba-ar, ki la kiew kyrdan sha ka Super Division ha kaba kin ïoh ban ïashim bynta ha u snem ban wan.
Ïa ki jingïakhun semi final la buh ban pynlong ha ka dur jong ki 3 tylli ki jingïakhun, kata ka don ka eliminator bad ka qualifier. Kaba nynkong (qualifier) kan long ha ka 4 tarik u Nohprah hapdeng ka Ladthadlaboh pyrshah ïa ka Sailung Ïalong ha ka por 1.00 baje nohphai sngi. Kaba ar (eliminator) kan long ha ka 5 tarik hapdeng ka Niaw Wasa pyrshah ïa ka Nangbah Mulang ha ka por 1 baje nohphai sngi.
Kaba lai pat ka long ha ka 6 tarik ha kaba ka kynhun kaba rem na ka qualifier kan aireng pyrshah ïa kaba jop ha ka eliminator ha ka por 1 baje nohphai sngi.
