New Delhi, Naiwieng:
Katkum ki khubor la ong ba ka jingkiew kynsan ka jingkem pang ki paidbah nong China, ka la pynkynmaw biang ia ka jingwan jong ka khlam Covid-19 ha ki snem ba la leit, ha kaba la ong ba ki paidbah nongshong shnong ka China ha kine ki sngi ruh ki la ioh kem ia ki jingshitom ba shem jingeh ha ka ban ring mynsiem. Katba na ka liang ka tnat ka koit ka khiah bad ka sorkar jong ka China, la ong ba kane ka jingktah jong ki riew paidbah kam long kaba ap jingma bad kam dei ruh kano-kano ka khlam kumba la mut ne suba da ki tnat bapher bapher jong ka pyrthei haba iadei bad ka jinglong- jingman jong ka koit-ka khiah hapoh China ha kine ki sngi.
La ong ba kane ka jingpang ba thymmai ka la ktah ruh ia katto katne ki skul bad jaka pule kiba don ha China, hynrei ka Sorkar China ka la kam bad pynksan ba kam don jingma eiei haba iadei bad kine ki jingshitom bad la ong ba ki long hi kumba ju long man ka por.
Kham bun na kitei kiba shah ktah ki dei ki khynnah bad la ong ba ki kmie ki kpa jong kitei ki khynnah ki la pynpaw ia ka jingsngewkhia kaba jur halor ka jinglong- jingman jong ka jingkoit-jingkhiah ki khun ki kti ha kine ki sngi namar ka jingleh sting jong ka sorkar bad ka jingkheiñ sting wat haba bun ngut ki khynnah hapoh ka ri ki la shah ktah na katei ka jingshitom ring mynsiem ba thymmai.
Katkum ki khubor la ong ba ka tnat National Health Commission jong ka China, ka la pynbna nyngkong eh ba la lap ia katei ka jingshitom dei ha ka 13 tarik u Naiwieng. Naduh katei ka sngi hi, ka la don ka jingkiew ha kiba ioh kem ia katei ka jingpang man la ka sngi bad bun na kitei kiba ioh kem pang ki hap ban poi thiah hospital khlem da long shuh ban pynslem.
Hynrei kane ka mat ka la sdang ban heh hadien ba ka World Health Organization (WHO) ka la kyntu ia ka China ba ka dei ban ai jingpynshai halor ka jinglong- jingman bad ka koit- ka khiah jong ki paidbah nong China namar katei ka jingshah ktah jongki ha katei ka jingshitom kaba wan mih thymmai, ha kaba kham bun ki dei ki khyllung- khynnah kiba shah ktah bad ioh kem bha ia katei ka jingpang.
Shuh shuh ruh la ong ba kane ka jingpang ka kham jur bha hapoh ka nongbah Beijing hi kumba long u khñiang jingpang Covid-19 ha ki snem ba la leit. Kawei na ki hospital ba paw tam hapoh Beijing ka la pyntip ba ki don kumba 1,200 ngut ki briew ba wan thiah pang man la ka sngi naduh ba wan mih katei ka jingshitom ba thymmai ha kane ka por.
