Tokyo, Nohprah:
Ki shipai duriaw jong ka Japan ha ka Sngi Palei ki la iakhun shitom ban wad ia 7 ngut ki shipai ka US kiba la jah rngai ha katei ka duriaw hadien ba ka liengsuiñ shipai na United States ka la leit hap hapdeng ka jingkilan ha katei ka thaiñ.
Hadien kumba katto-katne kynta, ki shipai duriaw ka Japan ki la ioh sei ia uwei u shipai uba khlem tip briew shuh bad hadien kata pat la pyntip noh ba utei u shipai u la khlad noh namar ka jingkdang um da ki bun kynta ba u la ngam shapoh um.
Ka tnat Special Operations Command jong ka US Air Force ka la pyntip ba 8 ngut ki shipai liengsuiñ ka US ki la jah rngai hadien ba ka liengsuiñ CV-22B Osprey ka la leit hap bakla shabar ka Yokota Air Base jong ka Japan ha ka Sngi Palei.
Katba ia ka daw tynrai jong katei ka jinghap ka liengsuiñ ym pat lah satia ban tip bad ki tnat wad bniah ka US ki dang ialeh ban wad bniah ioh don ki jingthut ha katei ka liengsuiñ naduh shuwa ka por ban kiew shalor suiñ.
Ka tnat pahara duriaw jong ka Japan ka la pyntip ba na ka liang jong katei ka tnat, ka la ialeh katba lah ban pynkloi ia ki lad jingiarap tang mar ia iohi ia kane ka jingjia. Kumjuh ruh la ong ba ki bor pahara duriaw ki la leit da 6 tylli ki jhad bad 2 tylli ki liengsuiñ ban bud dien bad wad ia kitei ki shipai ka US ha ryngkat katei ka liengsuiñ kaba la leit hap bakla ha katei ka bynta jong ka duriaw ha Japan.
Ha katei ka jingleit wad, la ïadon bynta lang ruh da ki pulit jong ka Japan bad kumjuh ki nongshong shnong na kitei ki thaiñ rud duriaw jong ka Japan. Hynrei lada ym lah ban shem ia ki, la ong ba yn hap ban pyndonkam da ki kynja tiar ‘Special Sonar Devices’ khnang ban ioh ban peit thuh ‘Scan’ ia ki bynta ba shapoh jong katei ka duriaw.
