Shillong, Nohprah 01
Ka Pohkseh SC bad ka Marbisu SC ki la ïoh jingjop ha ka Second Division Football League 2023 ba la pynïaid da ka Shillong Sports Association ha ka sngi Thohdieng ha SSA Stadium, Polo.
Ha ka jingïakhun kaba nyngkong ka Pohkseh ka la pynliem ïa ka Laitkyrhong SC lyngba ka shi kol ba la thep da u Freddy Jyrwa ha ka minit kaba 7.
Haba phai sha ka jingïakhun ba ar, ka Marbisu SC ka la pynliem ïa ka Sohryngkham SC da 2-1 kol bad kane ka la wan urlong lyngba u Seiborlang Nongbri.
Ha kane ka jingïakhun ka Marbisu ka la ïoh ban pynkhih jar nyngkong eh lyngba u Seiborlang ha ka minit kaba 21. Une u rangïalehkai shakhmat u la pynbud biang ïa ka kol ba ar ha ka minit kaba 59. Ha shwa ban wai ka Sohryngkham ka la lah ban pynphai kylla lyngba u Mebanpynshngaiñ Warkhyllew ha ka minit kaba 90+5 hashwa ba kan mad ïa ka jingshah rem.
Ka jingïalehkai ha ka sngi Saitjaiñ kan long hapdeng ka Sohïong SC pyrshah ïa ka Mawtawar SC ha ka por 11:30 mynstep, katba ka Laitlyngkot SC ïa ka Nongkrem SC ha ka por 2:30 noh phai sngi.
