Jerusalem, Nohprah:
Ki bor pyniaid ka Israel ha ka Sngi Palei ki la iathuh ba kawei ka briew ka la khlad ha shen bad 8 ngut kiwei pat ki la mynsaw hadien ba jia ka jingsynreit kuli ha ki bynta khyrdop khappud jong ka Jerusalem ha katei ka sngi.
Ki pulit ka Israel ki la iathuh ba 2 ngut ki lehnoh kiba la leit poi da kawei ka kali ha katei ka jaka, ha katei ka sngi ki la hiar ryngkat bad ki suloi ban synreit kuli naphang sha kat kiba don ha katei ka jaka. Hadien kata ki bor pahara kiba don ha katei ka jaka ki la iakhun bad ioh pynliem ia 2 ngut ki lehnoh ha katei ka jingjia.
Mar hadien katei ka jingjia la ong ba bun tylli ki kali kit nongpang ki la leit bran-bran sha katei ka jaka tang mar ia ioh jingtip halor katei ka jingjia. Na ka liang ki pulit ka Israel ki la leit ban kerkut ia katei ka thaiñ baroh kawei ioh dang don ki jingma kiba ap ia ki ‘riew paidbah kiba iaid ba ïeng na katei ka jaka bad kumjuh ruh kito kiba shong ba sah ha katei ka thaiñ.
U nongrah ktien jong ka United States sha Israel, u la pynrem jur halor katei ka jingjia bad ong ba ki lehnoh ki nud ban shim kabu ia ka Israel wat ha kum kane ka por ba ka dang don hapdeng ka jingiakynad bad ka Hamas.
