New Delhi, Nohprah:
Katkum ki khubor, la ong ba iwei khyllung ba ju khot kyrteng da i Kfir Bibas ba dang don khyndai bnai ha ka por ba ki lehnoh Hamas ki la rahbor ha ka 7 tarik jong u Risaw napoh ka iingsah na Israel i la khlad noh. Kumjuh ruh la ong ba wat ka kmie bad u hynmen ba 4 snem jong itei khyllung ruh ki la shah rahbor lang ha ki lehnoh Hamas naduh katei ka por, hynrei ha ka Sngi Balang ki lehnoh Hamas ki la pyntip ba baroh 3 ngut ki shi-kmie shi-khun ki la ia khlad lut na ka jingther bom jong ka Israel sha Gaza.
Ha ka jingkren ba la pyllait ha katei ka Sngi Balang, ka tnat shipai iada jong ka Israel ka la pyntip ba ka dang wad bniah halor katei ka jingpynbna jong ki lehnoh Hamas haba iadei bad katei ka jingther bom jong ka Israel sha ka jaka ba don ki paidbah ba shah rahbor ha Gaza.
Hynrei ka Israel ka la pharep kylla ia ka Hamas bad ong ba baroh ka long namar ka jingleh jong ki lehnoh Hamas hi namar dei ki lehnoh Hamas kiba rahbor ia kitei ki paidbah nong Israel sha Gaza bad kumta ruh ka Israel ka la bah-khlieh ia ka Hamas ba ka dei ban shim jingkit khlieh halor kiei kiba la jia baroh hapdeng ka jing-iakhun thma bad ka Israel.
Katkum katei ka jingpynbna jong ki lehnoh Hamas ha katei ka sngi, ki la pyntikna ba utei u khyllung ba la ju khot da u Kfir, u hynmen jong u- u Ariel bad ka kmie jongki- ka Shiri, ki la khlad noh ha ka jingther bom jong ka Israel shuwa ki khyndiat sngi shuwa ban sdang ka jingsangeh thma ba 4 sngi jong ka Israel hapoh Gaza.
La ong ba katei ka longiing Bibas ka long kaba kham kyrpang ia ka Hamas napdeng kito kiba ka la rahbor baroh ha ka 7 tarik u Risaw bad ka daw ka long namar ka jingdon jong itei i khyllung ba 9 bnai.
Kumjuh ruh ia u kpa jong katei ka longiing, la iohi ha ki dur ba la pyllait naduh ba sdang jong ka thma, ha kaba la iohi ia utei u rangbah uba la shah ialam ha ki lehnoh Hamas ha katei ka por ba ki leit ban rahbor ia ki briew na Israel ha ryngkat ka snam kaba tuid na ka khlieh jong u ha katei ka por.
Na ka liang jong ki bahaiing-hasem jong katei ka longiing, ki la pyntip ba ki dang ap tang ia ka jing pyntikna jong ki bor pyniaid ka Israel ban pynshisha la katei ka khubor ka long kaba dei na ka long tang ka jing pynsyier jong ki lehnoh Hamas khnang ba ka Israel kan sangeh noh ia ka thma ioh kan wanrah jingma pynban ia ki paidbah kiba la shah rahbor bad kiba dang don hapoh Gaza.
