Shillong, Nohprah 01
U Myntri ka tnat ïalehkai ka Jylla u Bah Shakliar Warjri u la pynpaw ba la ïaid kylleng ka Jylla ha kaba u la ïoh ban ïakren ïa ki samla bad nongïalehkai ha ki jingïalehkai bapher bapher.
Ïa kane u la pynpaw ha ka sngi pynkut ïa ka 7th Elite Men’s National Boxing Championship ha ka sngi Thohdieng ha SAI Indoor Hall kaba ha NEHU, hadien ba u la ïoh ban sakhi ïa ki katto katne ki jingïakhun final.
“Naduh ba nga la shimti kum u Myntri ka tnat ïalehkai, nga la ïoh ban ïaid kylleng ka Jylla bad nga la ïoh ruh ban ïakren ïa ki samla bad ki nongïalehkai. Ka Sorkar ka ïohi jngai ïa ki nongïalehkai kiba don ïa ki sap ïalehkai ba kynsai bad ngi donkam ban ïatrei lang bad ki samla lem bad ki synjuk ïalehkai na ka bynta ban ïohi ïa ka jingkiew ki nongïalehkai. Kane ka dei ka thong ka jong ngi bad ban pynurlong ia ki,” u la bynrap.
Ka jingwanrah ia kum kine ki lympung ka la long ka jingpynshlur bad ai mynsien ïa ki nongïalehkai ka Jylla ba kin long kiba trei shitom. Te kumta ka long kaba donkam ban ïoh ïa ki jaka ïalehkai kiba biang, ki rukom jied kiba kat kum ka juk mynta bad ka jingai jinghikai kaba paka na ka bynta ban kyntiew ïa ki nongïalehkai bad ruh ban lah ha ka ban pynurlong na ka bynta ban ïoh rung sha ka Olympic Games.
“Nga sngwkmen ban ïohi ïa ka jingtrei shitom hapdeng ka MBA, BFI bad ka Sorkar Jylla ha kaba kane ka lympung ka la long kaba jop,” la bynrap u Bah Warjri. “
Shuh shuh utei u Myntri u la pynpaw ruh ha kaba ïadei bad ka jingshim khia na ka bynta ban tes haduh 14,500 ngut ki khynnah ïalehkai. Napdeng kitei, 200 ngut la pynduna ki ban hap hapoh ka Elite Pathway Programme bad tang 12 ngut kiba la shah jied ban ïoh rung sha ka Super Elite Pathway Programme.
