Shillong, Nohprah 01
Ka Services Sports Control Board (SSCB) ka la rah ïa ka nam lahduh bad kum ka kynhun ïakura kaba kynsai tam ha ka sngi pynkut ïa ka 7th Elite Men’s National Boxing Championship ha ka Sngi Thohdieng ha SAI Indoor Hall kaba ha NEHU.
Kane ka kynhun ka la lah ban khur haduh 10 tylli ki takma ksiar ha ka jingïakhun final. Napdeng ki 12 ngut kiba la rung sha ka final ha ki 13 tylli ki bout, 10 ngut ki la lah ban khur ïa ka jingjop.
Ha kane ka sngi la lah ban pynlong ïa baroh ki jingïakhun final jong 13 tylli ki bout, ha kaba ki khlur ïakura kum u Shiva Thapa na Assam, Amit Panghal na ka Services bad u Sanjeet na ka Services ki la ïoh ïa ka jingjop. Ha kine ki hynñiew tylli ki sngi, ki paidbah na ka jylla ki la ïoh ban sakhi ïa kane ka lympung ïakura kaba la long ha kane ka nongbah naduh ba ka la ïoh ban pynlong ïa ka South Asian Games ha u snem 2016.
Ïa kane ka lympung kaba la sdang naduh 25 tarik u Naiwieng, la pynlong da ka Meghalaya Boxing Association (MBA), ryngkat ka Boxing Federation of India (BFI) bad la kyrshan lang da ka tnat Sports and Youth Affairs jong ka Sorkar Jylla.
Ha kane ka sngi la wan sakhi lang da u Myntri ka tnat ïalehkai u Bah Shakliar Warjri, u MLA ka Mawlai u Bah Brightstarwell Marbaniang, kumjuh u Secretary General ka BFI u Hemanta Kumar Kalita bad u Working President ka Meghalaya State Olympic Association u Bah John F Kharshiing nalor kiwei pat.
Ki la don haduh 9 ngut ki rangïakura ka Jylla kiba la ïoh ban ïashim bynta bad tang ar ngut kiba la lah ban jam shaduh ka pre-quarterfinal, hynrei ki la mad noh ïa ka jingshah rem watla ki la lah ban pynpaw ïa ka jingtbit ha kane ka jingïakhun.
Ha kane ka jingïakhun final, u Barun Singh na ka Services u la lah ban pynliem noh ïa u Yaiphaba Soibam na Manipur da 5-0 ha ka 46-48kg. Hadien kata la bud sa u rangïakura uba la khur ïa ka takma rupa ha ka World Championships 2019 u Amit Panghal (Services) uba la jop ïa u Anshul Punia na Chandigarh da 5-0 ha ka flyweight 48-51kg.
U Lalit jong ka All India Police u la long uba nyngkong ban pynliem ïa u rangïakura uba na ka Services u Pawan ha ka bantam 51-54kg da 4-3.
Ha ka final jong ka featherweight 54-57kg ki ar ngut ki Sachin ki la lah ban khur ïa ka takma ksiar, ha kaba ka Services ka la jop ïa ka Railways. Hadien ha ka final jong ka lightweight 57-60kg, ka Services ka la jop ïa ka Railways lyngba u Akash uba la jop ïa u Varinder Singh.
U Shiva Thapa na Assam u la lah ban pynliem noh ïa u rangïakura na ka Services ha ka light welterweight 60-63.5kg. Watla ma u lem bad u Vanshaj ki la ïakhaid ha ka rukom iakhun, hynrei na ka liang ki nongbishar ki la rai jop ïa u Thapa.
Ka Services ka la khur jingjop biang ïa ka jingjop ha kiwei pat ki hynriew tylli ki jingïakhun final. Ha ka welterweight 63.5-67kg, u Rajat u la jop ïa u Abhishek Yadav na ka Railways, katba u Akash u la pynliem ïa u Abhinab Saikia na Assam (uba la ïoh ïa ka nam Best Challenger Boxer) ha ka light middleweight 67-71kg. Ha ka middleweight 71-75kg, u Deepak u la jop ïa u Ishmeet Singh na ka Railways bad u Lakshya u la lah ban pynliem noh ïa u Harsh Choudhary na Rajasthan ha ka light heavyweight 75-80kg. Kine baroh ki jingjop ki long da 5-0.
Ka jingïakhun kaba khadwei ka dei ka cruiserweight 80-86kg, u Vishal na Haryana u la sdang ban pyni ïa ka jingkhlaiñ bor hashwa ba u Jugnoo na ka Services un kura da kaba tyngeh ha ka wat kaba khatduh na ka bynta ban jop da 5-2.
U Sanjeet na ka Services, uba long u lahduh ha ka Asian Champion 2021 u la khur jingjop ha ka heavyweight 86-92kg da 5-0 pyrshah ïa u Naveen Kumar na Haryana.
Ha ka jingïakhun final kaba khatduh jong ka super heavyweight 92kg+ hadpdeng u Sagar na ka Railways bad u Jaipal Singh na ka Punjab. Ha kane ka jingïakhun u Sagar, uba la khur ïa ka takma rupa ha ka Commonwealth Games 2022, u la shah rem noh ha ka wat kaba lai hadien ba u Jaipal u la kura da kaba tyngeh bad na ka liang u rephri u la hap ban pynsangeh noh ïa ka jingïalehkai.
